Momukabun gata, sawit id Sinulihan nakaramit tombului
KENINGAU: Notimung oh momukabun gata om sawit id Kg Sinulihan, Sook hiti di Tadau Koonom montok pinopoimbulai kaganggarahan diolo karait kaantakan gatang ih mombus-lombus do ingga kosimbanon tosonong mantad po di piipiro toun nakatalib.
Pinopointalang ih timbang porosidin KadazanDusunMurut(KDM)Malaysia, Mudi Dubing do pinitimungan nopo dilo nga niyanan montok minonimung do komih ngawi mantad momutung gata om nogi mongungupu tuwa do sawit.
“Mantad komih ngawi pinoimbulai do momukabun, agayo kalansanan do aangaian mogihum oh karalanon papadagang asil mongoi do koinsonong nodi oh gatang montok komogoton pogigiyon do tulun kampung,” ka di Mudi.
Tumanud di Mudi, nokorikot nopo do minongoi tombului id pitimungan momutung gata om mongupu sawit dilo nga ih Porosidin KDM Malaysia, Datuk Peter Anthony om nogi ih Puru Lansanon Koundangan Pogun (Adun) Likas, Tapantang Junz Wong.
Miampai kinorikatan di Peter, pinopolombus isio do pomusarahan karait kowoyoon dagang do asil tanom ngawi mantad id Sabah om alansan isio do kotoboi dara ngawi oh mogigiyon kohompit ontok naamot po do orulud oh laang popomogot do gatang.
Naamot, kinorikatan di Junz pinopoimbulai kalansanan do oinsanan kobolingkangan norongou disio aangaian papabanta id pitimungan koundangan pogun Sabah montok mongunsub do porinta maganu laang manakadai kobolingkangan otoguang do momukabun ngawi gata om sawit.
Ih Mudi nopo baino nga songulun mongingindapu nakapaas laid poinsikul do kaganaan marketing id Australia.
Poingampai nogi potindapou do ontok dilo oh piipiro momuruan kinoiyonon miagal di Martin Tommy, Ahuar Rasa mom Bonepes.
WOOKON tulun kampung nokotindapou pitimungan id Sinulihan, Sook.