Pulis pinapakakung kaparagatan koimaan taraat ‘Geng Botak’
KOTA KINABALU: Kaparagatan koimaan taraat sontimungan kusai ih kikotumbayaan do puru ‘Geng Botak’ nakaanu pinapakakung kalapas duo wulan aparagat idsuang kaparagatan mongorumpak om mongundoronok posorili bogian kakadaian tagayo.
Kiginumu siam ‘suspek’ kiumur bindurugan 17 gisom 42 toun ginakom idsuang walu rontob pinonugkuan tuminimpuun 18 gisom 21 September nakatalib.
Boyoon Pulis Watas Kota Kinabalu Asisten Komisioner M. Chandra minoboros do tinimungan ‘Geng Botak’ kikotumbayaan do aparagat mantad podi wulan (Julai) 2017.
“Miampai kinagakaman puru tinimungan diti, nakaanu pulis minanalasai do siam kes manakau/mongorumpak ih kopoompit do piaga-aga kinorugian kiginumu RM10,100 id posorili watas diti.
“Koinsanai ‘suspek’ ih tinaan kopoompit do apat tulun kinoiyonon om limo tulun songkosuaian kaamung turu mantad diolo noilaan ‘positif dadah’.
“Suai ko ilo, turu mantad suspek nogi kiharo rikud koimaan taraat laid ih kopoompit do kes dadah, manakau, mongorumpak om kinosuangon tolosok,” ka dau pinapatantu do kinantakan hiti koniab.
Minoboros isio do pinonugkuan tinimungan mantad Bogian Ponoriukan Koimaan taraat Longkod Upis Watas (IPD) hiti kopoompit do bogian Kampung Air, Asia City, 1Borneo om Kakadaian Manggatal.
Minoboros Chandra do nakapamagahau nogipulis do iso korita Perodua Viva kiwarana opurak ih minomoguo do numbur koporijistaran pilasu songowian tolu tinan komputer riba, 13 talipaun piowit-owit om sinsing amas.
Koinsanai barang pinamahauan dilo piagaaga do kigatang RM35,000.
Tumanud dau, modus operandi tinimungan dino nokomoi, suspek mamanau id tohuri munggui ih mindalan kakod om mamagahau barang kigatang sanganu munggui mantad tohuri.
“Sokiro ko sumaap munggui, suspek momoguno do laang tokodou montok kapaganu do barang sanganu munggui pogului mogidu.
“Mimpuupura nogi suspek mokianu sigup mantad munggui pogului songulun mantad diolo manaan munggui miampai papataru longon id liou munggui.
“Ontok timpu iso’i, songulun kagu suspek minaganu talipaun sanganu munggui om turus minogidu,” ka dau.
Minoboros Chandra do koinsanai suspek soriukon tumanud Seksyen 380, 384, 392, om 394 Kanun Koinggoritan om Seksyen 15 (1) (a) Akta Dadah Koligogon (ADB) 1952.
Idsuang ahal dilo, pinosorou do bogian dau o tulun togumu mooi do kada asaanang otombirangan miampai ponombirangan tulun taraat om minsodu tinan mantad tulun ih
Barangan ih nahau id pinonugkuan kuminaa koinsanai ‘suspek’.
kopongorosi dilo.
Suai ko ilo ka dau, tulun togumu mositi mongilag mantad mamanau osongulunan id tiyonon di aiso tulun om poposunud tosisikap kumaa pulis sokiro ko kokito do nonggononggo tulun ih kopotongob toiko kopongorosi om kuminam minsomkok.