18 lamin nopunso notutudan id Kampung Sim-Sim
SANDAKAN: Kiginumu 18 lamin nopunso id kinotutudan do naamot tulun ngawi Silam pinopoturuk solat id Kampung Sim-Sim, tangadau koniab.
Monguasa Koupisan Bomba om Mongumolig Malaysia (JBPM) Zon Sandakan, Anddre Andrew minoboros do nokotorimo o bogian dau do pamalahauan kokomoi kinotutudan dilo id jam 12.28 tangadau.
“Apat injin bomba om duo padsakaian sakadai songowian 23 upisor om puru linuguanan ku minoi doid tampat kinantakan kinotutudan,” ka dau.
Minoboros isio do nokorikot o bogian dau 10 minit lobi 7 kilometer mantad Balai Bomba.
“Kinotutudan nantakan kopoompit do lamin id sawat waig misampaping miampai Masjid Watas Sandakan,” ka dau.
Minoboros Anddre do minomoguno o bogian dau do duo kopoluyungan miampai apat kosomputan mantad kotos waig tangki injin bomba montok momisok kinotutudan dilo.
“Piaga-aga do 18 lamin nopunso id kinotutudan dilo om nakaanu o bogian dau minanamong tapui mantad karalad doid ratusan lamin songingoros id bogian dilo kiikira jam 1.14 sosodopon,” ka dau.
Minoboros isio do gisom baino diti masaon do bogian dau monimung kopoilaan suang lamin ih nokoompit id kinotutudan.
“Aiso nunuunu ruputan kinoligaganan kiniopon om kinosindualan pinoruput id kinantakan dilo,” ka dau.
Minoboros Anddre do kakaal poh bogian dau papanau do ponoriukan kokomoi natadon om ginumu kinorugian kinotutudan dilo.