Rela manakadai panamangan
# Haang popogiot koumohigan id Esszone # 50 upisol, puu pinihi sabaagi perintis
LAHAD DATU: Kiikila 500 upisol om puu Koupisan Sukarelawan Malaysia (Rela) id Sabah onuan kalaja monuhung agensi popogiotkuasa mongintong koumohigan boogizan Zon Atampasi Kohisaon Sabah (Esszone).
Koputusan naanu id Pitimbungakan Tinan Mononontuduk Esszone ih pinoniikon songovian di Kumoduvo Huguan Montili, Datuk Seri Dr. Ahmad Zahid Hamidi om Vozoon Montili Sabah, Tan Sri Musa Aman, doiti koniab.
Minoboos doid monunuat abal kahapas miting dino, minoboos Ahmad Zahid do soginumu 500 upisol om puu Rela id 10 uvang koompit id projik perintis ih posunudon idsuang timpu toduuk diti.
Ka disido, montok boogizan kotimpuunon boogizan dosido monoodo koposodiaan kamaung no manaak pinghudaan doid upisol om puu dino nokomoi.
“Izioho (puu Rela) koiko kavo tana suvai ko hobi kalati potitikid boogizan doiho (Esszone). Ingkuo po nga, ahal koundangan om koumohigan momoguno do pinghudaan, dadi iho maan todoo idsuang timpu tosisikap,” ka disido.
Nokotindapou nogi id miting dino nga Huguan Potunud Koumohigan Pogun Jen (B) Tan Sri Zulkifeli Mohd Zain, Huguan Potunud Kastam Diraja Malaysia Datuk Seri T Subromaniam, Monunuat Kopolintaan Pogun Sabah, Tan Sri Sukarti Wakiman, Huguan Staf Markas Angkatan Tentera Malaysia Lt Jen Datuk Abdul Halim Jalal, Kumoduvo Huguan Polis Pogun Tan Sri Noor Rashid Ibrahim, Laksamana Maritim Datuk Indera Zulkifili Abu Bakar, Pesuruhjaya Polis Sabah Datuk Ramli Din om Komander Esscom Datuk Hazani Ghazali.
Ahmad Zahid ih nogi Montili Suang Pogun minoboos do maza kopoinsomokan dio, puu Rela adadi dati do nuhudan koduvo gugumaga id Esszone, om agensi koumohigan suvai kakaal sabaagi tinimungan tagazo pongintongan om papanau kalaja id boogizan dino nokomoi.
Soginumu 6,148 mantad 121,888 upisol om puu Rela id pointongkop Sabah susu’on montok tuduvan diti nga soginumu 500 koompit idsuang projik diti.
Id ahal dino, pinatahang disido do minggisom kozo o kopolintaan pisompuuvan miampai pamalanan timpu tanau kopolintaan pogun popobuu do pomounan ponombuhuzan miampai popoguhu do ahal koumohigan.
Ka disido, Sabah ih nointutunan miampai kinoizonon sandad, tisan daat om tahun tropika kivaa pamalanan montok mamagazat solizong tutumombuhui mantad China.