RM3.083 riong poruntukan pinatahak kuminaa sikul, gereja om kuil
KUDAT: Kiginumu 61 sikulan, gereja om kuil id Wilayah Pantai Barat Utara Sabah nokotorimo do poruntukan tounan koporintaan pogun kiginumu RM3,083,000 hiti di kawawagu.
Montiri Karaja-Karaja Poimbida ih nogi Puru Lamin Koundangan Pogun (Adun) Tanjong Kapor, Datuk Teo Chee Kang minoboros do Koporintaan Pogun pinoposodia do poruntukan kousinan kuminaa sikulan ngawi, gereja om kuil mantad podi timpu koporintaan Parti Bersatu Sabah (PBS) sundung pia idginumu di lobi okoro.
Baino, ka disio, koporintaan barisan Nasional (BN) pinoposodia do poruntukan montok monokodung kopotundaan sikulan, gereja om kuil id pogun diti om pinoposodia noh bajet RM32 riong potitikid toun montok tujuan dilo.
“Iti ponokotanda do komitmen koporintaan BN kumaa balajaran, om ponompuanan ih miirad nopo kumaa toinsanan tinaru om agama,” ka di Teo id abaabayan kapanahakan hiti.
Teo ih nogi Ponorikohon Komiti Poruntukan Koporintaan Pogun montok Sikul Sina om Tinan Kaagamaan Okon Silam minoboros do ontok toun diti nokopoobi o koporintaan pogun do RM1,475,000 montok sikulan, RM1,238,000 montok gereja om RM370,000 montok kuil id Pantai Barat Utara Sabah
Alansan kopio isio kumaa ponorimo ngawi tuh kopomoguno do kousinan dilo miampai tososonong montok papanau do projik kotundaan om koponorinaan.
Minoboros Teo do sikulan ngawi om tinan ngawi agama okon Silam nakapangapalai noh kiginumu RM264 riong mantad koporintaan pogun toun diti. Poingkuro poh nga, bulun noh koporintaan pogun kaanu popoobi do RM32 riong montok sikulan ngawi om tinan ngawi agama miampai lobi ogumu kogunoon pokionuon.
Nokotindapou nogi id abaabayan dilo Panakadai Montiri Kousinan, Datuk Seri Panglima Michael Asang; Panakadai Montiri doid Boyoon Montiri, Datuk Edward Yong Oui Fah, Ponorikohon Komiti Karaja Sikul Tosuriba Sina Sabah Datuk William Chu, Monunurat Pulitik kumaa Montiri, Peter Chong, Monunurat Piturubungan Montiri, Albert Kok, Momuruan Kotundaan Rayat (PPM) Tanjong Kapor, Datuk Peter Chin om Residen Dewan Perniagaan om Perindustrian Cina Kudat, Pak Chee Eng.