Porinta manahak ‘ganjaran’
# Kumaa tulun ih manahak kopoilaan kikompitan pamagasuan aiso kasagaan
KOTA KINABALU: Timbangon do koporintaan montok kapanahakan ‘ganjaran’ (wawa panod-napod) kumaa tulun ih manahak do kopoilaan om tanda kokomoi kaparagatan pamagasuan aiso kasagaan id pogun diti.
Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun minoboros do ilo nopo nga iso laang tosonong tuh laang lobi osikap kaanu papanaon mantad tinan kikoompitan.
“Ahal diti masaon timbangon hinonggo wawa panapod-napod patahakon kumaa diolo ih manahak do kopoilaan kumaa koupisan toiko agensi ih kikompitan kokomoi kapamataian tolosok.
“Iti popomilo do haro o tiwou tonggungan suai mantad poposuang do gambar ngawi id laman Facebook sompori-pori om magandad piipiro tadau montok poporuput doid Koupisan Tomposion Lalang toiko nonggo-nonggo agensi koompit.
“Ahal irad dilo kiguno kopio sabap tonggungan montok mintamong tomposion/tayam lalang okon kiharo id suriba agensi ih kitonggungan noopo,” ka dau.
Noboros dau ahal dilo ontok romuto do monunurat abar kopinamot Pangaramitan Tadau Tulun Mindaama Di Agaras Nayatan Pogun Sabah 2017, hiti koniab.
Minoboros Masidi do ilo nopo nga asil mantad miting ih pinaharo di kawawagu diti songowian Koupisan Tomposion Lalang hinonggo, maya do laang dino nokomoi okon noopo popomilo do tinan kitonggungan kapaganu do kopoilaan lobi osikap katapi kaanu nogi monulung montok manalasai do kobolingkangan pamagasuan/pongintalunan tolosok dilo.
“Ilo nopo nga iso ponokialitan tagayo montok dagai nga koupisan id suriba Komontirian Ponombuluian, Koubasanan om Kinoiyonon Posorili (Kepkas) baino miampai laang oulud kawawagu montok monoriuk kes pinamataian buu id Pulau Bum-Bum Semporna, di kawawagu.
“Iti kaanu monulung tokou mongilo do tulun ih momonsoi do pamagasuan tolosok,” ka dau.
Ka dau kakaal aiso poh ningkokoton potilombus kokomoi kes dilo sabap bogian Koupisan Tomposion Lalang haro minoboros do koupisan dau okurangan pakakaraja montok papanau do toinsanan karaja dilo.
Id suang ahal dilo, pokionuon di Masidi o toinsanan koupisan id suriba Kepkas kikompitan pomogompian kinoiyonon posorili od tayam id suriba Kepkas kikompitan kopomogompian kinoiyonon posorili om tayam ih atamangan koompit songowian.
“Id miting dilo, nakaakun tokou noh tuh nunu noopo laang ih kikompitan maan papanao songowian miampai koupisan, toiko agensi suai miagal Taman-Taman Sabahom Koupisan Katalunan mooi kokurangan winakas idsuang Koupisan Tayam Lalang kaanu mongulu,” ka dau.
Suai ko okurangan winakas, kotoguang nogi Sabah do ponokialitan di awawagatsabap ahal dilo kopoompit do mogigion ih toririmo mindudaliu.
“Miagal ih noilaan tokou, iyolo ih pinoboros do nokoompit miampai pinamataian buu diti montok ‘tujuan ekonomi’ nopo nga iyolo ih aiso karayatan pogun.
“Sabaagi suntu, mogigion ngawi Pala’u hinonggo au oku moboros diolo iyolo ih kitonggungan, katapi iyolo doti ih nokoompit sabap asaru mundadaliu.
“Nopo nga osusa montok dotokou mogiboboros miampai diolo sabap au asapou ih karati toiko koilo moboros id Boros Malayu toiko Inggeris,” ka dau mikuo minanamba do kaantaban dilo kapanahak kosusaan montok momonsoi ponoriukan.
Osusa nogi papanau do ponoriukan sabap kodomutan kapanahakan kopoilaan montok laang potilombus.
Minoboros Masidi do soira tinimungan monoriuk Koupisan Tomposion Lalang nokorikot id tampat kinantakan, koubasanan do iyolo ih nokompit dilo nokoundaliu noh mantad tiyonon dilo.
Om, osiliu ilo pialatan ponokialitan ih notoguang do Koupisan Tayam Lalang.
“Kalansanan tokou nopo nga tuh rayat songkoiyonon misokodung montok poporuput do kinantakan diti pogului nuununu tanda dilo natagak,” ka dau.
(gambar)