Pekan Baru Ulu Dusun poingkawas konuonuan songkoiyonon

SANDAKAN: Boyoon Montiri Tan Sri Musa Aman minoboros do laang porinta popotounda do Pekan Baru Ulu Dusun nopo nga montok kolumaagan rayat, doulu noh mogigion id posorili watas dilo.

“Iti kapanahak doti liwang di alaab montok rayat id posorili watas diti montok moniaga om kaanu nogi popoingkawas do ‘ekonomi’ paganakan sompori-pori,” ka dau ontok pinotimpuun do Abaabayan Mamabak Tana Pekan baru Ulu Dusun, hiti di kosuabon koniab.

Isio ih nogi Montiri Kousinan pinapatarang do kinapaharaan kakadain wagu dilo kaanu doti popoingkawas ‘ekonomi’ songkoiyonon suai ko koponorimo koluyungan kotundaan lobi doung kawawagu om olumaag.

“Kakadaian wagu diti papanau do toggungan kiguno sabaagi laang montok mamagayat lobi ogumu korikotan tutumombului om rurumikot ngawi tumanud do tiyonon dilo ih ponogi tiyonon pogumbayaan,” ka dau.

Minoboros ih Musa do tiyonon dilo nopo pogumbayaan tombului ngawi mantad Tawau, Semporna om Lahad Datu ih mongoi id Sandakan om Kota Kinabalu.

“Ugu nogi mantad Kota Kinabalu, Ranau toiko Telupid ih mongoi id Tawau toiko Sandakan ih pinoposiliu do koiyonon kakadaian wagu diti sabaagi pogumbayaan montok minum, mingkoyod om momoli barangan pogului popotilombus do pindalanan diolo,” ka dau.

Minoboros isio do momusorou o porinta montok popoiyon do piipiro agensi porinta sabaagi laang montok monulung mogigion id koiyonon dilo.

Id ahal dilo, minoboros isio do minggisom o bogian porinta montok popotounda do watas ngawi ih osorou do kangaam kopio potundaon miagal Pekan Baru Ulu Dusun dilo.

“Tonggungan diti poomungon id suriba Tinan Kotundaan Pomulaminan om Kakadaian (LPPB),” ka dau.

Kinopohoroon kakadaian wagu miagal dilo kapanahak doti asil tagayo kumaa rayat om porinta mantad kawo korikotan do tutumombului ngawi.

“Kinorikotan rayat pogun China doid Sabah nokorikot oh 400 noribu ih obuli korikot gisom soriong tulun sontoun. Ruputan diti naramit tokou mantad agensi ponombuluian pogun China ontok kinakapan ku do hilo,” ka dau.

Minoboros ih Musa do agensi ponombuluian dilo nogi mokianu koporintaan pogun poposodia do pongidopan, longkod podtuongisan (resort) om restoran di lobi ogumu montok momogonop do korikotan tutumombului ngawi.

“Poinggumuon do koporintaan pogun o kapamansaian hotel, resort toiko ‘homestay’ montok momogonop korikotan lobi ogumu tutumombului, okon noopo mantad pogun China nga Brunei om pogun suai nogi,” ka dau.

Ka disio miampai korikotan tutumombului di ogumu id Sabah, kapanahak doti kosiwatan pakarajaan kumaa tanak kinoiyonon om popoingkawas do ‘ekonomi’ songkoiyonon.

“Potontuon do porinta o kosiwatan pakarajaan ih kiharo patahakon kumaa tangaanak ngawi kinoiyonon diolo haro pakarajaan ih kapanahak ekonomi toiko pandapatan kumaa paganakn,” ka dau.

Ontok tipu iso’i minggisom nogi isio popotopot do kopokionuon mogigion om lansanon rayat hiti ih muhang kopio iso masjid.

Id ramai dilo, pinapatahak nogi ih Musa do toluod kumaa tinimungan nongolohing om tulun kosuaian winakas (OKU).

Nokotindapou nogi ih Panakadai Montiri Koporintaan Kinoiyonon om Pomulaminan Datuk Zakaria Edris, Panakadai Montiri Kousinan Datuk Seri Panglima Michael Asang, Ahli Parlimen Libaran Datuk Juslie Ajirol, Puru Parlimen Batu Sapi Datuk Linda Tsen Thau Lin, Adun Sekong Datuk Samsudin Yahya, Adun Sukau Datuk Saddi Abdul Rahman, Pengurus LPPB Datuk Ahmad Haji Bujang om Presiden Majlis Perbandaran Sandakan Datuk James Wong.