APMM minonuhung sumakit tondu pokiubatan id hamin pongusapan
KUDAT: Songuhun tondu monontizan tuu vuhan nokotoimo sakadai kaagaban kahapas nakakandai ‘pagaganakan naatu’ (PV Bleeding Placenta Previa).
Tondu ih nointutunan sabaagi Milina Jaid, 21, nokotoimo sakadai dino nokomoi mantad tinimungan Agensi Popogiotkuasa Maritim Malaysia (APMM) doiti.
Potunud Maritim Wilayah Sabah om Labuan Laksamana Muda Maritim Mohd Zubil Mat Som minoboos do tuhun sumakit dino nokomoi novit mantad Karakit Pulau banggi minomoguno do Bot Kilat 1 kiikila jam 12 tangadau di tadau Minggu.
Poguhui kinantakan, nokotoimo o boogizan disido do pamahaavan kaagaban id jam 10.15 kosuvabon mantad Dr Hanif Abdul Rahman ih pakalaja id Klinik Kohidasan Karakit.
“Songian nopo Bot Kilat 1 nokoikot id Jeti Karakit Pulau Banggi, tuhun sumakit ih kinouvang di tina dau pinosikap pinavahiu poguhui nokoikot id Jeti Marina doiti kiikila jam 1.20 sosodopon.
“Hamin pongusapan ih nokotoimo kopoihaan kokomoi ‘operasi’ diti nogi minanaak sakadai tosikap kumaa kitoluod dino,” ka disido doiti koniab.
Minoboos isido, puu mantad Bot Kilat minonuhung nogi pinopoundahiu sumakit mantad bot novit doid ambulans om kahapas dino novit doid Hospital Kunak montok pokiubatan potihombus.
Tumanud disido, Maritim Malaysia poinsodia tikid timpu montok manaak ponuhungan di kosudong kozo doid tuhun ngavi om agensi om koupisan kopolintaan ih suvai ontok antakan o kaagaban toi kaantakan talaat kinoizonon.
Id timpu iso’i, mimang nogi isido doid mogiigizon ngavi tu tomoimo popoluput doid APMM sokio do kotoguvang onu noopo kobohingkaangan id daat om suvai ko tumuubung MERS 999.