Kousinan RM25.38 riong posodiaon
# Malaysia manamong koumoligan id Selat Melaka om Singapura
KOTA KINABALU: Malaysia insan poh kagu nonuan tonggungan poimponu solinaid tolu toun montok ‘mekanisme’ misokodung idsuang ahal mintamong koumoligan om koponorinaan maya do ‘Tabung Bantuan Alat Pelayaran’ (ANF) id Selat Melaka om Singapura.
Kumoduo Montiri Padsakaian Datuk Abdul Aziz Kaprawi minoboros do tonggungan dilo patahakon solinaid timpu tolu toun mantad 2018 hinonggo laang dilo pogului diti pinapanau do Singapura.
“Kousinan ANF ih kiginumu RM25.38 riong (AS$6 riong) dilo gunoon montok tujuan mintamong koumoligan Selat Melaka om Singapura miampai momoguno do teknologi doung kawawagu idsuang kakamot kapamanaan.
“Nokoumbal Malaysia nonuan do tonggungan dilo ontok 2008 gisom 2012 pogului Singapura minonowoli tonggungan dilo.
“Monongktoluod tokou nogi kumaa toinsanan pogun ih minonoluod do kousinan kumaa tabung diti miagal China, India, Jepun, Indonesia, Republik Korea, Emiriah Arab Bersatu (UAE), International Foundation for Aids to Navigation (IFAN), International Maritime Organization (IMO), Malacca Strait Council (MSC), The International Chamber of Shipping (ICS), om ogumu kagu pogun om tinan/ koisaan,” ka dau.
Noboros dau ahal dilo kalaaps pinotimpuun do ‘Majlis Forum Kerjasama untuk Keselamatan Pelayaran’ om ‘Perlindungan Alam Sekitar Marin’ id Selat Melaka om Singapura ke-10, hiti koniab.
Minoboros Abdul Aziz do ginumu kousinan ih pinotoluod kumina tabung dilo mantad podi 2008 nopo nga kiginumu RM85.44 riong (AS$20.2 riong) om noolu dilo AS$6 riong baino diti pinatahak kumaa Malaysia.
Ka dau, ‘objektif mekanisme’ pisokodungan dilo nopo nga montok popointutun do misokodung papanau karaja id pialatan pogun watas om nogi pogun momoguno Selat Melaka om Singapura, doulu noh monorina toinsanan koumatan sakadai kapamanaan id selat dino nokomoi montok papatantu do ilo kotilombus sabaagi ralan perkapalan oumolig id pogun diti.
“Kapal mogisusuai guno wagu MV Polaris ih naganapan kakmot ngawi ponorinaan doung kawawagu gunoon montok monulung ahal kikompitan kaagaban kapal ih momoguno do Selat Melaka om Singapura.
“Sokiro ko piromuton miampai Selat Melaka om Singapura, ginumu purata kopomogunaan ralan dilo di kapal dagang mantad pogun kikompitan nopo nga kiginumu 130,000 sontoun,” ka dau.
Tumanud dau pialatan pikoruhangan tagayo montok ‘mekanisma’ pisokodungan dilo, koiso nopo nga papaharo do ‘dialog’ om pogibabarasan songowian pogun kongompit. Koduo nopo nga kikompitan miampai kapamanaan ‘Jawatankuasa Penyelarasan Projek ‘(PCC).
Minoboros Abdul Aziz do kiharo 13 projik selat ih pointutunon om maan papanao di pogun ngawi id poingompus disan daat suai ko koponorimo do sakadai kousinan om ‘teknikal’ mantad momoguno ralan selat dilo.
“Mantad dilo, pokionuon ku tuh momoguno ngawi goduo-duo ralan selat diti manahak do ponimbangan di tototopot kumaa projik ih masaon papanaon diti.
Nokotindapou nogi id abaabayan dilo nga Boyoon Potunud Koupisan Daat Datuk Baharin Abdul Hamid, Boyoon Potunud Padsakaian Daat (DGST) Komontirian Padsakaian Republik Indonesia I Nyoman Sukayadnya om Boyoon Eksekutif Bogian Monguasa Lolokiton om Maritim Republik Singapura Andrew Tan.
Id abaabayan ih iso’i, suminaasi nogi Abdul Aziz do Abaabayan Misain Pihubayaan (MoU) Ponoriukan Kawagu Hidrografik montok Skim Penyuraian Trafik id Selat Melaka om Singapura id pialatan Malaysia, Singapura, Indonesia om Komontirian Tana, Infrastruktur, Padsakaian om Ponombuluian Jepun.