NOKURO MA TU MIMBOBOROS O TULUN?
POINTANTU no do aiso sinding kinongohon tokou nung au no o tulun milo mimboboros. Tikid tinaru do haro boros. Boros tumanud do tinaru om tinaru tumanud do boros. Boros o kointutunan do tinaru. Katagakon do boros kopogowit do kapatayon do tinaru. Ondomon do tulun mantad pogun Malaya do boros diolo nopo nga rusod do tinaru diolo. .Nunu ka do tuni boros tulun Kadzandusun do mongupus do boros tinaru? Sisimbar: Aiso noilaan ku.
Boros Kadazandusun milo do gumaras (becomes stronger) om minggumu toilaan rati boroson (increases in vocabulary knowledge) nung gunoon do somboros (speakers) do monikid timpu id pibarasan tikid tadau, sumambayang, monuduk om modsinding sumompipi Kadazandusun id walai panambayangan. Boros gunoon id kapangandaman do kinosusuon do Isa Al-Masih (Natal) apatut do id boros Kadazandusun. Sinding (hymns), ponudukan (sermons), om sambayang (prayers) apatut do boros Kadazandusun o gunoon tu Buuk Kinorohingan (Bible) dino di toun 1960an po do nadalin id boros Kadazandusun. Nga gisom timpu baino, au gunoon do tulun Kadazandusun Buuk dino do rumayou Gampamasi. Nokuo ma tulun Kadazandusun tu au arahi momoguno boros tinaru do sumambayang id Kinorohingan?
Toinsanan tulun Kadazandusun i notumbayaan do Injil apatut daa momoguno boros tinaru sondiri do rumayou Kinorohingan soira otitimung yolo sumambayang id labus kakadayan. Ngaran do Kinorohingan nogi nga roiton diolo id boros tinaru sondiri om au no minog roiton diolo id boros do tinaru wokon. Boros Kadazandusun nogi nga pinatahak do Kinorohingan om asanangan o Kinorohingan mokinongou om rumamit rarayou tulun Kadazandusun id boros tinaru diolo sondiri mantad no do nosianan o Kinorohingan do toinsanan tulun id pomogunan diti ii kaampai no tulun Kadazandusun.
Nokuro ma tulun Kadazandusun tu au agaras sunduan do mongupus boros tinaru miagal do tulun mantad pogun Malaya? Uhang diolo do moboros noopo boros tulun mantad pogun Malaya. Boros English ii nosiliu boros sompomogunan, okon po do lodison (dreaded) do tulun Kadazandusun do minsingilo om olokot tutok diolo do minsingilo? Nokuro ma? Boros tinaru sondiri nogi nga au diolo gunoon do mogiboboros id walai sondiri kumaa tanak om kumaa puru sampaganakan (family members). Id walai panambayangan, sumambayang, monuduk om modsinding yolo id boros tulun mantad pogun Malaya om Indonesia.
Nokuro ma? Koiso pounayan diolo nopo nga tangaanak diolo au no karati boros tinaru sondiri om tombului di nalap diolo mantad tinaru suai au karati boros Kadazandusun? Nga nokuro tu au poingkokoton diolo songulun i milo papadalin boros Kadazandusun kumaa boros tombului dino toi nunu manaku kasalaan nung pologoson diolo i tombului dino do minsingilo po do boros Kadazandusun do namot diolo tumombului? Ogumu tulun Kadazandusun i asawat sinikulan om toilalaan diolo boros tulun mantad pogun Malaya nga au milo mimboboros do boros Kadazandsun.
Tulun mantad pogun Malaya koirak yolo nung kotoinu (kokito) do koulalaho tulun Kadazandusun miagal dilo narait tiinu. Tulun mantad pogun Malaya kiharo iso boros poinukadan i kosindir kopio do tulun Kadazandusun. Miagal diti: “Anak kera di hutan disusukan, anak di ribaan sendiri ditinggalkan,” ka. (Tanak do gobuk id gouton ongoyon posusuo, tanak tino di poingkibit tongkiadan nogi,’ ka do dalin rati dilo poinukadan.
Nung piagalon do pongupus boros tinaru, poinukadan dilo milo rotion metaphorical do poingkaa: Boros tinaru wokon o boroson, boros tinaru sondiri yadaan
(olimon), ka. Ogumu korubatan nung atagak o boros tinaru. Boros Kadazandusun agaras momungaran do nunu nopo ii kaampai no koinsanan talun om totonomon id timbaan om gouton.
Tulun mantad pogun Malaya nogi nga okudian do boros pomungaran do nunu nopo lolobi po om ngaran do Science om Mathematics. Kogumuan boros ii haro timpu baino diti nolos noopo diolo mantad do boros English. Tulun Kadazandusun nga milo nogi mongolos boros English do popoinggumu om papagaras do boros Kadazandusun miagal ko buuk (books), miting (meeting), sikin (second), obulou (blue), maat gaat (mud guard)
Koponondigan do tadau kaamatan om kapangandaman do tadau Natal tikid toun kapanaak do tulun Kadazandusun do iso kosiwatan tagayo do manampasi boros tinaru. Kapangaramayan do tadau kaamatan au ogonop nung indai poginakanan noopo toi ko nun gindai popokito noopo do sayau, garung om linundus tinan moyo pioliban linundus do unduk ngadau. I misintogu unduk ngadau nogi nga apatut do ototopot kopio do sandad koilo moboros boros tinaru sondiri okon tinuduktudkan noopo moi do kaampai do pisaapan dino. Nung au nopo, au daa yolo milo paampayon id pisintoguan dino.