Projik kotundaan RMK11 hiti nakapanau tososonong: Musa
KOTA KINABALU: Koponguhanan projik kotundaan id suriba Abaabayan Malaysia Ko11 (RMK11) id Sabah kapanau tososonong miampai 81 paratus toiko RM646.874 riong mantad poruntukan kotundaan pobion koporintaan pogun montok toun koiso nakabalanja noh di toun nakatalib.
Boyoon Montiri Tan Sri Musa Aman minoboros do noruhangan noh koporintaan pisompuruan o poruntukan kotundaan kiginumu 12.6 paratus kumaa RM4.277 bilion ontok 2017, toun koduo kapamanaan RMK11 piagalon ontok 2016.
“Gisom 25 September toun diti, ginumu projik ih nokolulus noh nga 647 ilo nopo nga 304 projik pinongoputan om 343 projik kawawagu, kopoompit do pialatan dilo koponguhanan Talun Alun Tagayo Pan Borneo Sabah, kapanaakan waig om lotirik labus kakadaian, ralan piromutan kampung om abaabayan pomulaminan rayat,” ka dau minanahak boboroson id Kaadat-adaton Koponingadan Tingot Kogoyoon, Bintang om Pingat Pogun Sabah kopinamot kinouliton toun ko64 Gounal Pogun Sabah Tun Juhar Mahiruddin id Moligai Pogun, hiti koniab.
Minoboros ih Musa do tumilombus koporintaan pogun papawakas karaja montok popoburu kotundaan om nogi papawakas do agenda moningolig nasib rayat montok papatantu diolo kotilombus kapaganu do kotoonongan, kolumaagan om koburuon togumu.
Kokomoi Koridor Kotundaan Sabah (SDC), minoboros ih Musa do kiginumu RM2.5 bilion nakatahak noh koporintaan pisompuruan montok projik ngawi kotundaan SDC id suriba RMK9 gisom RMK11 gisom 30 Jun nakatalib.
Minoboros isio do mantad ginumu dilo, kiginumu RM2 bilion toiko 93.6 paratus nakatahak noh di Bogian Monguasa Kotundaan Ekonomi om Kapaapuan Sabah (SEDIA).
“Mantad podi pinoimaganan SDC ontok 2008 gisom suku koduo toun diti, kiginumu RM163 bilion id suang kapaapuan ‘kumulatif’ nokorikud noh,” ka dau.
Kokomoi bogian id suriba ‘Halatuju’ Pogun, noboros di Musa do ilo nokotilombus nokoponurat kinosunion kopongunsub kopio miampai ‘prospek ekonomi’ tosonong pinongunsuban di bogian ngawi tagayo kaamung noh bogian ponombuluian positif didorong oleh sektor-sektor utama termasuk sekih nokotilombus ogirot miampai nokoponurat kinorikotan 2.109 riong tutumombului montok timpu turu wulan koiso toun diti.
Tumanud dau ginumu dilo nopo nga kinoingkawasan duo rontob ilo nopo nga 10 paratus piagalon timpu iso’i di toun nakatalib, om Sabah kakaal nosiliu tiyonon ponombuluian di nointutunan kopio kumaa tutumombului songkosuaian om suang pogun.
Minoboros isio do masaon do koporintaan pogun papanau do mogisusuai laang montok mamagayat lobi ogumu tutumombului kaamung popoingkawas do kounalan pongidopan miampai projik kawawagu pialatan dilo nopo nga Sabah International Convention Centre, Tanjung Aru Eco Development, Jesselton
Quay om Kota Kinabalu Convention City.
Noboros nogi di Musa do masaon do koporintaan pogun mongukab tiyonon ponombuluian tongosonong kopio id potitikid watas id Sabah.
Minongomi bogian pamansaian, noboros di Musa do ilo ponokotanda do ‘momentum’ kosunion kopongunsub kopio miampai gatang ‘eksport’ barang kapalabusan kilang nokoingkawas 13 paratus kumaa RM1.194 bilion montok pitanga koiso toun diti piagalon timpu iso’i sontoun nakatalib.
“Tapan Pomorunan Kota Kinabalu tumilombus mamagayat lobi ogumu koposuangan papaapu miampai kotundaan Digital Free Trade Zone om idsuang timpu iso’i, pinapaharo nogi koporintaan pogun do ‘Shared Services and Outsourcing Centre ‘ montok monulung pomorunan tokoodo om osuhatanan (PKS) papadagang do asil kapalabusan kakamot id dagang kinoiyonon om sompomogunan,” ka dau.
Montok popoingkawas do kolumaagan rayat id labus kakadaian, minoboros Musa do potilombuson do koporintaan pogun o abaabayan miagal Kabun PPRT (Abaabayan Kotundaan Rayat Mosikin Kopio) om Abaabayan Kopoingkawasan Ekonomi Songkoiyonon, suai ko monginsonong do abaabayan Mini Estet Sejahtera (MESEJ) montok monulung tulun ngawi lumabus mantad garit komosikinan.
Namot dilo, Juhar id pason poimbida dau pinoposorou do rayat Sabah montok toririmo momogompi do pisompuruan mogisusuai tinaru om mamagatng do gatang kopoposion tolidas montok tumilombus do kotoonongan om koburuon ih naanu baino diti.
Pokionuon nogi disio o toinsanan rayat id Sabah manahak do pisokodungan kumaa porinta montok momogompi om gumaga do kotoonongan om koumoligan om nogi manangod do karaaton om mongipop ‘ekstremisme’ id ahal nunu noopo.
Pinoboros nogi di Juhar o katangaban kinarayaton pihubayaan om kapapanaan ‘ekstremisme’ ih mangasou ngawi kolumaagan koposion tulun ngawi id pogun diti om muhang tinimungan dilo intongan om rulanon miampai apantod.
Id ningkokoton suai, muhang ih Juhar do tumilombus o koporintaan pogun papawakas do kotundaan ‘modal insan’ tosonong kopio, kikabaalan om kitoilalaan takawas montok poposigampot do iman-imanon poposiliu do Sabah sabaagi iso pogun koburu katanud ‘Dasar Transformasi Nasional 2050’ (TN50).
Muhang nogi isio do sunduan misokodung ih posodia haro pialatan pakakaraja tulun ginumuan pogun om Pisompuruan kotilombus kogirot sabaagi tinimungan opurokis om awakas montok papatantu do toinsanan abaabayan kotundaan palanon montok kogunoon rayat kaanu papanau miampai kalantoi.
Ontok kaadaton dilo, Montiri Watas Pisompuruan Datuk Seri Tengku Adnan Tengku Mansor minomoyoon do nuludan ngaran ponorimo tingot kogoyoon, bintang om pingat tapantang pogun miampai nokotorimo tingadan Seri Panglima Darjah Kinabalu (SPDK) ih kopogowit gelaran ‘Datuk Seri Panglima’.
Nokotorimo nogi SPDK nga ih Montiri Poimbida Sabah Datuk Teo Chee Kang; Boyoon Pulis Pogun Tan Sri Mohamad Fuzi Harun; Panglima Angkatan Tentera Malaysia Jeneral Tan Sri Raja Mohamed Affandi Raja Mohamed Noor om Puru Tinan Mononontuduk Parti Pertubuhan Pasokmomogun Kadazandusun Murut Bersatu (Upko) Datuk Tuanku Balanggung.
Kiginumu 1,023 tulun tinangadan tingot kogoyoon, bintang om tingot tapantang ontok pinangaramitan toun diti. Bernama