Sukarelawan Sikaut Kelana nakakandai himo totombi, duvo ‘suspek’ pokionuon pulis
TAWAU: Duvo ‘suspek’ pokionuon pulis kokomoi do ponoizukan kes pinonugkuan koimaan talaat om nakapanaak kinosinduahan kumaa songuhun sukarelawan Sikaut Kelana gisom nakakandai 33 totombi.
Huguan Pulis Uvang Tawau ACP Fadil Marsus minoboos do goduvo-duvo suspek nointutunan sabaagi Mohammad Ridzwan@Adik om
Ican.
“Goduvo-duvo suspek kiumul 20-an om poingizon id Kg Bukit Kukusan,” ka disido doiti di tadau Kaapat minongomi koozuvon ponoizukan kes dino.
Minoboos Fadil do kinantakan pinoluput nantakan ontok 30 September kiikila jam
12.30 tanga sodop id habus tansa sikul tosiibo doos Kg. Kukusan.
Tumanud disido, munggui kusai, 30 ih nosinduahan pinokiubatan sabaagi sumakit habus om nokotoimo 19 totombi id tuhu, 10 id hongon gibang om apat id hongon vanan.
“Munggui kikotumbazaan do sinangod di apat suspek,” ka disido, mikuo pinapatantu do ponoizukan kakaal papanaon kopoompit koinsasanai kikoompitan ‘kronologi’ kes dino.
Minoboos isido gisom baino diti puli minanaan reman duvo tadau suspek ih kiumul 20 toun om goduvo-duvo dioho nogi poingizon id Kg. Bukit Kukusan, gisom 13 Oktober.
Poguhui minoboos isido, songuhun mantad mongingia sikaut nokokito duvo kozuzuvon suspek au otutunan suminuvang tapak pomihusapan id pagang sikul ontok 29 September kiikila jam 11.30 dongotuvong.
“Ingkuo po nga, goduvo-duvo suspek minogidu songian nokoiho kinoikotan dosido noihaan di mongingia dino,” ka disido.
Sumusuut kinantakan dino, mohoingon sikul kahapas dino minonuu do pimpanaan papanaon montok mangantob onu noopo koponugkuan mantad kotihombus antakan.
Nga, ontok pimpanaan pinapanau di mongingia ngavi, sontimungan apat kusai ih poundoong id habus tansa sikul minagnu haang miampai pinapagavad vatu.
“Munggui kahapas dino huminabus tosonguhunan pinougadan doid tampat tinimungan suspek ih pinapagavag vatu montok mongudizo sundung tu noduan di mongingia suvai naamot magandad koikotan pulis.
“Himo minit kahapas dino, guminuhi mahik munggui id koozuvon nosinduahan om aiso mongingia nokokito kinantakan tototopot sabap koozuvon otuvong kozo om pivohitan di ososoodu,” ka disido.
Gisom baino, ponoizukan kes kakaal po papanaon pulis tumanud Seksyen 447 Kanun Koundosoan om 324 Kanun Koundosoan.
Utusan Borneo pinoiho do pinogoduhan mongingia dino nokomoi (ada habus) au oongou sabap ahal pivohitan di osodu om munggui minoi soomo kaapat-apat suspek sabap kotutun dosido.
Noihaan nogi do kapaagatan pinomihusapan dino nokomoi nogi nampazat di 50 CLC Pramuka Indonesia suvai mantad kinampazatan puu ngavi sikaut kinoizonon.