NITUNGKUS DI AKI LIMBAD
POINTUUK ih Aki Limbad monulimod do mangarus di lias id burunsut walai dau. Soroiso-iso ih lias naarus potimungon no dau siri sunduk, tu mada do alaangan tanganak. Iri noh tu osulang kaka gia kad tongo komoloingan.Kopongo dau mangarus ih lias, tundolio noh ka mangarus ih wakau.
Waro ih norisan talansau, om suai po ka ih norusan torilis. Iri no kabarasan kuutan di Aki Limbad monikid tadau, tu au no di kowogui do tumakad rumuuk no mongoi mongumo. Gowoi ka nogi rumilik om mongoi tagad.Au koungkirop ka gia ih Sudangkir mongimot om mongompuja di Aki dau do mangarus lias om wakau. Otonung noh ih mato dau do mongintong ti moki’ilo yoti do momonsoi bubu om popok. Iso-iso ih ka gia ih Sudangkir do manangaki dau do mamit momoomonsoi pongimpori sada. Ih wokon nopo nga tindooi ngawi do momiansau magasu om momutanom.”Onuo dogo lo taasaan. Angarol noh ti pais pangarus ku,” ka gia di Aki Limbad do minonuu di Sudangkir mongongoi panganu di guka taasaan sirid somok do tukad.Ingkakat om tangkus no ka gia ih Sudangkir do minongongoi di taasaan. Om pataako noh di dau di taki dau ih guka. Romito no di Aki Limbad ih guka. Om mingilingi po ka gia di manandai mangasah di pais dau.”Nokuro tu piasah-asah nu no pais aki? Atarom po tokito ku?” Ka di Sudangkir do mongoduat.Poilio no di Aki Limbad dii ih taasaan, om towingug migom poinsondiu di tolig tinata tamalang. Gompoto dau ih kosigupan om pongolumbid no.
Kopongo mongolumbid, bogidai dau ih sigup. Osulimod kaaka di do mongosil di sigup, om opian poobus di lisun mantad id kabang om todung.Kowili Aki Limbad di Sudangkir. Boros ka dau, “au nopo piasah-asah ti pais, nga araag lo wakau.
Au noh milo do popokogos om mongimbolit lo garau bubu.””Kumoimbagu no om au kopi’irad lo noruson wokon no oboh.” Boros ka di Aki Limbad koimbagu.”Ooh, irad bala gia noh,” simbar di Sudangkir.”Imatai no mongintong. Ingga poh suai tumungkus ti momonsoi kakamot pongimpori do waig suai ko ika,” ka di Aki Limbad miampai popotimung di niadaan norusan.Ingkakat no kah Aki Limbad. Sowingo dau ih barajit, om lintuun no mindauh.”Mongoi ko siongo Aki?” “Mangakap oku po di bubu silo bawang.””Potonudo oku,” ka di Sidangkir mokitanud.”Kanou...” Gambajo no di Aki Limbad ka ih Sudangkir.
Id ralan. Oluoi-luoi no ih tongus do sarup. Ih tadau nga tumuun noh id kotonobon. Tombolog nga song uniuni. Mampot-ampot nogi kabarasan ih Sudangkir momiwit. Mingis-kingis ih Aki Limbad korongou wiwit di manangaki dau.”Umbal mah ponurolo Ondu.” Tiag di Aki Limbad.”Au oku koilo,” simbar di Sudangkir.
”Ika mah gia aki ponurolo. Mokinongou oku di surolo di odu-odu.” Boros koimbagu di Sudangkir id taki dau.”Ehmmm...” Pongikod tokodo ka ih Aki Limbad. Om timpuun no di Aki Limbad mongolio-liou; “surolo… oi surolo kud surolo surolo todu-odu yodu odu poinggupu minggat id soliu-soliu soliu kud poring-poring… katigog kaaka ih gasi rumikot muni-uni kiniigit do turali moginum do pogoniri walado noh ka ih talum ogomon do moginum kada nopo kaalum waro mori oh mogium… ka surolo… oi surolo noh yodu-odu
Surolo gulu-gulu isai-isai ih mogodu
Olikuan moh tulu… ka naawi noh ka ih ralakon nopongoh noh ih gamason mogium poh dii tinumon mangandad di tomoton... ka
nuh po kah ih takanon mongupu tunduk gouton dungkarou noh ih pasamajon togilai noh ka ih rilipon… kaponurolo noh yodu-odu ka...surolo… oi surolo kud surolo surolo ku id timpak-timpak timpak lo pongimpaan mongimpa tanom-tanom tanom parai do tidong… kaorikot nopo ih kokotuan mogiujud id pitabangan kinoigit do linggaman kisinawing po pataan… kaatawos nopo yanakwagu kosumandakan mogisuusunu koirak yaki om yodu
oondos kianak taparu… kaIri no ka gia surolo diodu odu...”Oondos nopo ka gia ih Sudangkir nokorongou surolo di Aki Limbad. Ponoko suut-suut nopo di dau it niuni-uni taki dau ri.”Nakalaga kito no, taaso to poh lo bubu,” ka nogi di Aki Limbad.
Pogulu-gulu no ka gia ih Sudangkir lumintuun id bawang. Taaso dau ih bubu tokodo. Nuh ka gia kinataasan. Songturokir nopo ti dungkarou, turongou om tongo lumpis. Ih tongo tonggiput kano nga nakaampai nokosulung. Kakato noh di Aki Limbad ih bubu tiso nga irii ih kadau. Nga ingaa tonggiput di dau tu alambat ih bolit do bubu. “Ogumu sulung Aki...” “Kopongonsom tokou baino ondu,” ka di nisimbar di Aki Limbad.”Topuruon do goulan siwot aki,” ka di Sudangkir kadaau.Mirak-irak nopo kaaka gia ih Aki Limbad kokito di Sudangkir do Oondos ogumu noimporijan diotilo. “Ongoi po panatas roun tolidus. Ponompon to lo barajit,” ka di Aki Limbad. Osomok noh do naparasan ih barajit ka gia nosuangan sada.”Mogium tangau, pongogos to lo ponompon barajit,” susuutai po ka gia di Aki Limbad ih Sudangkir. Pamaku nopo ih Sudangkir ka gia. Mawos-tawos ih Sudangkir mamanau do oondos. Palabaa di sudangir manganu ka gia roun tolidus. Potunujo boh ih roun tolidus siri di Aki dau.”Ogumu nogi no roun tolidus naanu nu ondu,” ka di Aki Limbad.”Pongolupit lo tonggiput aki... Tiakan oku lo lupiton,” simbar di Sudangkir.”Kunamaan no boh tirad noh. Soira poh koumbaabalan do linupit.” Kah nogi di Aki Limbad do sinumimbar. Om kopongo no di kaaka gia yotilo minanganu di sulung do bubu. Pataano noh di koimbagi ih bubu sirid waig. Pouliai no di diotilo. Momon toomon ka gia ih Sudangkir nawagatan do sada towit muli.
Korikot noh di id walai, timpuunai no di Sudangkir monobuk om monginsisi ih sada. Ih nopo dungkarou om tonggiput pinisuai kabarasan. Ih noh tongolansaulansau nisuang id bangau ih wokon do nimaan onsomo, om suai po dii ih nimaan topuruoh kaaka.
Iri nopo dii ih tonggiput om dungkarou nga linupit di Sudangkir ka gia.Mingiskingigis nopo di ih Aki Limbad do mongompuja di Sudangkir mangagama di noimporijan diotilo. Om koponfo nopo di monguut di noimpori, akan nodi kah gia.Korikot noh di ka gia di totuong. Pabaako noh ih salong, om undar noh ka gia ngoduo mintungangis id tinombiringan siri noh ka gia ih Sudangkir poinsomok di Aki Limbad. Ingga suai ih suuton ka gia, iri noh tu, ih mokitangon di taki dau.”Umbalai oku mah tanganai aki,” ka di Sudangkir minobus.”Onuu bala titangon ku dika ondu? Naawi ku noh manangon ngawi.” kah gia simbar di Aki Limbad.”Tanganai oku di Dungkarou.” ka gia di Sudangkir do mokiinsian.”Oboh, soukat ka minonginsada om ino noh dii kabarasan pokitanganan nu.” Ka gia di Aki Limbad monokiingkaso di Sudangkir.”Mai nopo gia aki.
Koroijan ku mokinongou, nokuro noh ma do oinggapadan manangon.” Sumonsog ih ka gia ih sudangkir monokitangon di taki dau.Undar no di ka gia Aki Limbad. Om pongolumbid no di yoti. Gompoto no ih salong, poutudo no dau ih pompod do sigup linumbid dau. Miingi-lingi ka gia dii taki di Sudangkir mongosil di sigup.”Om poingkaa gia tu opipit ko ih do mokitangon, oo’on noh kotii, tu simbaron mori rogon kodung ko aiso noh mongoo,” ka nogi di Aki Limbad.”Oo...” ka gia di Sudangkir do sinumimbar toniba.
Maku-paku po ka gia, do poingkingis do oondos.”Waroo... Waro kah gia ondu. Waro kaaka ih Maki om ih Modu ka gia. Sompiduduuo ih id sulap-sulap poingijon sirid tisan do bawang,” ka di Aki Limbad do monimpuun manangon.”Ooo...” Ka di sudangkir mongoo do monimbar di tangon taki dau.
Timpuunai no dii ka di Aki Limbad posusui ih totongonon. Olimodok ka gia ih Sudangkir mogom mokinongou. Om sumowoli sumimbar do mongoo di tangon taki dau. Nga au poh ka gia noompus ih tangon, koiliu no ih sudangkir do nokoodop.
“Oo... Au ku poh noompus om nokodunsong ko noh kogoruk. Au ku no boh otilombus manangon ti koduung...” Ka nofi di Aki Limbad. Poundaro noh dii, di Aki Limbad ih sudangkir. Om topukai dau sirid sirang. Om ponokiampai noh dau do minundar miliu minodop ka gia.Pono ko intongintong di Aki Limbad ih sudangkir. Om osorou dau nogi.
Nuu nopo ih nowonsoi dau timpuh poh poimpasi, nuu nopo ih nikolombus mantad kabang dau do pinotuturan sirid di Sudangkir om osiliu tinungkusan gisom pompod koposijon. Inggaa po suai ih milo tumungkus ngawi ih niopung kookijan, suai ko ih Sudangkir iso-iso no ih kosolusui ngawi-ngawi ih nokotuturan om nowonsoi ngawi mantad komoloingan.