Kusai noduso Proton Wira nakalanggar lori

KOTA KINABALU: Songulun kusai noduso kalapas korita Proton Wira ih pinapanau dau nokopilanggar miampai iso lori id koligaganan id sodop Kolimo nakatalib.

Kinoligaganan dilo nantakan kiikira jam 10.50 dongotuong id Batu 7 Ralan Tuaran Inanam poingoros Gardenia Food Industries hiti.

Munggui ih kiumur 28 toun dilo pinatantu do minidu pogun id tampat kinantakan om kusai pinapanau lori kawo Nissan UD dino nokomoi aiso nunuunu nosindualan,

Boyoon Pulis Watas Kota Kinabalu Asisten Komisioner M.Chandra minoboros do pinonoriukan timpuuni nokoilo do papapanau lori dilo ruminikot mantad kaakdaian tagayo pakaayan id Gardenia Food Industries Inanam.

Tumanud dau, soira nokorikot id tampat kinantakan, papapanau dilo minomonsoi ponurugan ‘U’ pogului linanggar id bogian tohuri ponong gibang di Proton Wira munggui ih rumikot mantad Manggatal.

Sabap kinoligaganan dilo ka disio, munggui pinatantu do minidu pogun id tampat kinoligaganan id jam 11.18 dongotuong di upisor pongubatan mantad Hospital Tondu om Tangaanak (HWKK) Likas.

“Goduo-duo papapanau au noilaan nawuk om ponoriukan potilombus nokoilo do kinoligaganan natadon mantad kinolowongon papapanau lori sabap au minanahak ralan kumaa padsakaian id ralan tagayo ontok minomonsoi ponurugan ‘U’.

”Poingkuro poh nga, potilombuson ponoriukan tumanud Seksyen 41 (1) Akta Padsakaian Ralan (APJ) 1987 sabap pinapanau id koyuon miagab-agab gisom natadon kinapataion,” ka dau hiti koniab.

Id ahal dilo, pinosorou nogi di Chandra tuh momoguno ngawi talun alun manahak do tanda nung mongolon ralan, sumuang om lumabus simpang ralan.

Laang dino nokomoi ka dau montok momunso koligaganan om kaanu paparati kumaa padsakaian suai.

Pokionuon nogi do bogian dau o tulun

Proton Wira ih pinapanau munggui noindamaan naraag id kinoligaganan dilo.

togumu ih nokokito do kinantakan dilo mooi rumikot rumomut Upisor Monoriuk Trafik Insp Ngang Ak Kalimpot id numbur 0178693045 toiko nonggononggo balai trafik ih songindoros montok monulung ponoriukan.