Olimon DBKK panandasan

# Momonsoi projik id Tapak Tun Fuad Bukit Padang

KOTA KINABALU: Olimon do Dewan Bandaraya Kota Kinabalu (DBKK) o panandasan tinan ih tomodon paparayat abar au otopot kikoompitan pamalanan pamansaian projik kotundaan id Taman Tun Fuad Bukit Padang.

Mayor Bandaraya Kota Kinabalu Datuk Yeo Boon Hai minoboros do kopoilaan ih pinalabus di bogian nokoompit okitonan mogumbal papatangkid pomusarahan tulun ngawi kokomoi laang tosonong bogian dau gisom nokopongimbulai do katangaban kikoompitan kapamanaan taman dilo.

“DBKK au pinapaharo do pisokodungan miampai nonggononggo tinan montok popotounda do projik miagal ko tiyonon podtuongisan, hotel om susuai poh miagal ih pinarayat, nga pinopotimporon do linominon ih posodia haro noopo.

“Papanau noopo yahai do kuasa ih pinatahak do koporintaan pogun montok mintamong om nogi popotilombus do kabarakasan om kolumison ‘landskap’ Taman Tun Fuad suai ko monginsonong toinsanan kounalan montok kogunoon tulun ginumuan,” ka dau.

Noboros disio ahal dilo ontok romuto id Abaabayan Kapanahakan Wawa Ponupuan Kiosk kopinamot Festival Arkitek Borneo pinanjur Koisaan Arkitek Malaysia (Pam) om DBKK, hiti koniab.

Ontok Julai nakatalib, Koporintaan Pogun maya Boyoon Montiri Tan Sri Musa Aman minanahak kuasa kumaa DBKK montok mintamong Taman Tun Fuad Bukit Padang sabaagi tiyonon

YEO (tolu wanan) minokigambar kaandaman songowian puru tinimungan FACM UCSF ih nakamanang do Pialaan Ponupuan Kiosk 2017.

podtuongisan om ponguyatan tinan.

Minoboros Yeo do kalaaps sinowoli DBKK o tiyonon dilo ih kilinaab 153 ekar dilo, kogumuan tulun togumu ih korikot do hilo nasantaban ginawo miampai koumoligan om kasanangan ontok papanau do kaparagatan monguyat tinan id taman dilo.

Kokomoi do abaabayan dilo, kosokodung kopio do pinanganjuran pialaan ponupuan kiosk di okitonan sabaagi laang tosonong kopio Pam ih muhang monulung tulun ngawi.

“Kosokodung kopio DBKK doid bogian misosondiri montok monulung bogian monguasa kinoiyonon montok manahak kounalan ih kiguno kumaa tulun ngawi miagal pialaan koponupuan kiosk irad diti di obuli pokinamon.

“Nokoponuhu oku nogi kumaa Pam mogium koponupuan lobi ‘praktikal’ montok dotokou popoiyon id bogian labus kakadaian, kakampungan kaamung noh id taman id suriba panamangan DBKK,” ka dau.

Id pason dau, noboros di Yeo do pomogunaan bakaang gilingon kawagu id potitikid koponupuan nopo nga kangaam kopio sabaagi laang montok popoingkawas do kopurimanan tulun ngawi kokomoi panamangan kinoiyonon posorili om nogi kaanu papalaku do barangan kawawagu (inovasi) kinoiyonon.

Mantad dilo, alansan kopio isio tuh lobi ogumu kagu kobulihan kinoiyonon ih uminampai do pialaan dilo montok monulung DBKK momodimpot imanimanon poposiliu do kakadaian tagayo diti oborisi, otomou om oumolig montok iyonon.

Pogului, Tinimungan FACM UCSF nokoimbulai sabaagi ‘bontugan koiso’ koinsasanai pialaan koponupuan kiosk miampai minogowit muli tusin tunui RM10,000 om sijil kinampayatan.

Om tampat koduo namanang di tinimungan 4 Plus 1 om tampat kotolu namanag di tinimungan JWA D&B Sdn Bhd miampai sompori-pori minogowit minuli tusin tunui RM5,000 om RM2,000 om nogi sijil kinampayatan.

Nokotindapou nogi id abaabayan dilo nga ih Ponorikohon Pam Sabah Chapter Ar Arnold Kwan om Ponorikohon Panganjur Festival Arkitek Borneo 2017 Ar Ezekiel Lee.