Tolu suspek tinimungan manakau koumatan korita ginakom pulis
KOTA KINABALU: Nakaanu pulis minamagakom tolu tulun kusai kikotumbayaan do ‘suspek siniket’ manakau koumatan ngawi korita di aparagat id posorili kakadaian tagayo mantad podi wulan (Julai) nakatalib.
Boyoon Pulis Watas Kota Kinabalu Asisten Komisioner M.Chandra minoborosa do kotolu-tolu suspek kiumur id bindurugan 20 gisom 33 toun.
Tumanud dau, pinagakaman winonsoi id iso pinonugkuan kiikira jam 8.30 dongotuong ontok tadau Koonom nakatalib id posorili bogian Manggatal doros hiti.
“Pinonugkuan dilo pinapanau sumusuhut mantad iso ruputan kes kinapanakahan kikoompitan duo tinan tayar pinoopi id duo padsakaian sanganu koupisan porinta id Kapayan hiti.
“Pinonoriukan timpuuni, ontok 4 Oktober nakatalib, kiikira jam 9.30 kosuabon posorili Kapayan, noilaan di pinoporuput do duo tayar pinoopi id duo padsakaian sanganu koupisan natagak om kinotumbayaan do pinanakau,” ka dau hiti koniab.
Minoboros disio do asil kinopointalangan suspek, sontimungan upisor om puru mantad Bogian Ponoriukan Koimaan Taraat (BSJ) Longkod Upis Pulis Watas (IPD) hiti pinapaharo pinonugkuan id posorili Telipok Ria Tuaran kiikira jam 10 dongotuong ontok tadau Koonom nakatalib.
Nakapamagahau o bogian diolo do
Pialatan koumatan ih gunoon suspek montok manakau.
iso Perodua Myvi, 10 tinan tayar, limo rim om piipiro koumatan montok gunoon manakau ih kikotumbayaan asil kaparagatan taraat manakau montok ponoriukan potilombus.
Minoboros Chandra do pinonoriukan timpuuni nokoilo do kotolu-tolu suspek minangakun nokoompit idsuang kes kinapanakahan duo tinan tayar pinoopi sanganu koupisan porinta.
Suai ko ilo ka dau, koinsanai suspek nogi nokotumboyo nokoompit id piipiro rontob koimaan taraat manakau koumatan padsakaian ilo nopo nga tayar pinoopi posorili kakadaian tagayo mantad podi wulan (Julai) gisom baino.
“Pokimamaan tagayo suspek nopo nga padsakaian kawo 4WD miagal Toyota Hilux ih tongkiadan id bogian poundorongan padsakaian miampai aiso sanganu.
“Pinoniisan waig sobu nogi nokoilo do koinsanai suspek ‘positif dadah’ suai ko duo suspek kiharo rikud koimaan taraat laid kikoompitankes narkotik.
“Kes diti soriukon id suriba Seksyen 379 A (1) Kanun Koinggoritan om laang ponugutan tumanud Seksyen 39 C Akta Dadah Koligogon (ADB) 1952 papanaon nogi,” ka dau.
Tumanud dau, miampai kinalantaian kinagakaman dilo, nakaanu o bogian dau minanalasai do turu kes manakau tayar korita posorili kakadaian tagayo.