RM6 bilion montok kotundaan PPR id pointongkop pogun
KUALA LUMPUR: Popoobi o porinta do soosomok RM6 bilion montok popotounda do 120 Projek Pomulaminan Rayat (PPR) id pointongkop pogun miampai 83,759 unit lamin nopongo noh.
Boyoon Potunud Koupisan Pomulaminan Pogun (JPN), Jayaselan K. Navaratnam minoboros do kiginumu 41 projek PPR miampai 15,327 unit nopo nga masaon id kopoindalanan pamansaian om 23 projek miampai 10.066 unit kakaal id pamalanan.
Sabah nosiliu pogun ih winonsoi poinggugumu PPR ilo nopo nga 26,199 unit, ka dau doid Bernama.
Minoboros isio do pamansaian PPR lumansan doid piipiro ahal pialatan dilo ginumu kopokionuon di takawas mantad mogigion id toiso-iso bogian suai mantad pangapalaian mantad koporintaan pogun montok momonsoi tiyonon gatang tosuriba.
“Projek ih kopoompit do bogian PPR Siwaan om PPR Nasanganu pokimamaan kumaa poingiyon ‘setinggan’ om tinimungan kipandapatan osuriba ih kipandapatan suang lamin diolo au kolobi do RM3,000 sombulan.
“Projek PPR Siwaan posiwaan miampai RM124 sombulan noopo om montok PPR Nasanganu, bgatang dilo nopo nga RM35,000 seunit id Semenanjung om RM42,000 seunit id Sabah om Sarawak,” ka dau.
Kokomoi kopokionuon kumaa PPR, noboros di Jayaselan do pinangaramitan dilo kopongunsub kopio sabap lamin dilo siwaan om dagangon miampai rontob ih osuriba kopio piagalon rontob dagang kawo pomulaminan suai ih obuli korikot pialatan RM150,000 gisom RM180,000 seunit.
“Subsidi porinta kumaa PPR ih somoonu korikot lobi mantad 200 paratus nopo nga laang tosonong porinta montok monulung tinimungan mosikin montok kiharo lamin tiyonon diolo sondiri,” ka dau.
PPR torinaon do Komontirian Kolumaagan Kakadaian, Pomulaminan om Koporintaan Kinoiyonon maya JPN, ih kaampai amnatd lamin mitingkat montok bogian kakadaian om lamin pointana montok disan kakadaian.
Unit dilo kiharo tolu linimput toodopon, liwang tombului, dapur om duo linimput waig suai ko koiyonon pomulaminan dilo haro kounalan kiguno miagal ‘dewan komuniti’, surau, tadika, taman pamainan om gerai makan. Bernama