RM1.027 bilion popoinggayo tiyonon Lolokiton Sepanggar
KOTA KINABALU: Koporintaan Pisompuruan pinopoobi do kiginumu RM1.027 bilion montok popoinggayo korikohonon Lolokiton Sepanggar.
Montiri id Koupisan Luguan Montiri Datuk Seri Abdul Rahman Dahlan (gambar) minoboros do poruntukan dilo nopo nga montok papalaab kagu kotorinaan lolokiton dino nokomoi mooi lobi ‘efisien’.
“Bogian Monguasa Kotundaan Ekonomi om Kapaapuan Sabah (Sedia) om Lolokiton Sabah haro pamalanan montok poposiliu do Lolokiton Sepanggar sabaagi longkod ih kaanu momogonop om popoingkawas do poniagaan kontena id bogian diti idsuang timpu tosomok.
“Lolokiton Sepanggar diti kiguno kopio montok Sabah sabap pogun diti haro tiyonon di kangaam kopio montok sumiliu longkod padsakaian montok bogian posorili ih kopoompit Brunei-Indonesia-Malaysia-Filipina - Bogian Kosunion Timur ASEAN (BIMP-EAGA) om tiyonon di osomok kopio miampai Jepun, China, Hong Kong, Korea om pogun suai.
Minggisom Koporintaan Pisompuruan montok papatantu do lolokiton id Sabah kaanu popoingkawas om lobi kiasil mantad kawo kounalan kotorinaan dilo sabap karati tokou do iti noh ih popomilo do kos pongobi koposion toiko gatang barangan kaanu mngingkudi,” ka dau.
Noboros disio ahal dilo id pitimbungakan abar ontok kinakapan karaja dau doid Lolokiton Sepanggar hiti koniab.
Minoboros Abdul Rahman do miampai haro nopo kotorinaan lolokiton di lobi kiguno dilo kaanu mongingkudi do balanja poniagaan om kotutukon dilo kaanu nogi monulung mongngkudi kos padsakaian id Sabah.
Otumbayaan nogi isio do koporintaan pogun haro ralan tonudon om iman-imanon di tototopot montok mintong Sabah osiliu iso pogun di kiguno id suang bogian lolokiton idsuang timpu 10 toun rumikot.
“Mantad dilo, lolokiton diti nogi kaanu monulung mongingkudi kagu kosotolon di notoguang tokou mantad kawo kos padsakaian id Sabah,” ka dau mikuo minanamba do karaja popoinggayo korikohonon lolokiton dino nokomoi tuimpuun doti toun tabantalan.