Minsasaru mokiporisa susu

# Doulu noh koonduan tinimungan umur 40-59 toun

TAWAU: Tinimungan koonduan id pogun diti pokionuon tuh au monolikud do ralan pongubatan doung kawawagu id lamin pongusapan montok mongubat bato susu, ka di Panakadai Montiri Kotundaan Kotos om Koburuon Teknologi Kopoilaan Sabah Datuk Hamisa Samat.

Ka disio, laang au momoduli do pongubatan doung kawawagu om lumansan montok pongubatan tosonong di au opurokis om kontodonon noopo do bato karalad om osusa mongubat.

“Tinimungan koonduan mositi mintamong kolidasan om asasaru mokiporisa do susu miampai sondiri om obuli kapaganu do pongubatan ponugutan id lamin pongusapan,” ka dau.

Hamisa ih nogi Puru Lamin Koundangan Pogun (ADUN) Tanjung Batu minoboros ahal dilo id abaabayan ‘Pink Oktober Run 2017 For Breast Cancer Awareness’ id Padang Kakadaian koniab.

Ka dau, bato susu au obuli sirotan asaanang sabap toruol dilo nopom nga pongoduso koiso tondu miampai kotoguang doti kobolingkangan inlimo kogumu kumaa koonduan ih haro susuian ilo nopo nga molohing tondu toiko miadi-adi tondu sabaagi nakakandai bato susu.

Ka dau, tinimungan di poinggugumu kakandai toruol diti nopo nga tinimungan umur 40 gisom 49 toun om 50 gisom 59 toun miampai koulalahon di au momoduli om toilalaan di oribau kokomoi bato osiliu kontodonon doid koingkawasan rontob kapataion kumaa tondu ngawi.

Minoboros nogi Hamisa do tumanud ruputan koporijistaran Bato Kabansaan, ogumu sumakit rumikot odomut doid lamin pongusapan montok mokiubat, ilo nopo nga 42 paratus sumakit kiharo noh id rontob tolu om apat.

Ka dau 32 paratus mantad toinsanan kawo bato noilaan noh id pialatan tondu id pogun diti ih kiumur 45 toun om minsawat.

Id suang ahal dilo minoboros isio, ‘diagnosis’ tosikap okon noopo kopoingkawas do kosiwatan montok pongubatan di kalantoi katapi nogi kopongilag do balanja pongubatan apagon.

Idsuang timpu iso’i, tinimungan kusai nogi pinosorou do iyolo nga kotoguang nogi doti kaanu bato sundung pia ginumu diolo okuudi piagalon tinimungan tondu.

Kokomoi abaabayan dilo, noboros di Hamisa do potitikid puru tulun ngawi om agensi porinta kaamung kotinanan okon porinta (NGO) mositi monulung Komontirian Kolidasan manganjur do kimpin kopurimanan momunso bato susu. -Bernama

HAMISA songowian Komiti Tawau Kota Kinabalu Pink Ribbon.

HAMISA (wanan) ruminamit Pink Ribbon.

HAMISA ruminamit tanda pononmpulangad mantad Ponorikohon Tawau Kinabalu Pink Ribbon Christy Salazar kalapas pinotimpuun do ponongkusan dilo.

PIALATAN minampayat ngawi ponongkusan id Padang Perbandaran Tawau.

HAMISA pinotimpuun do Pinkober Run 2017 for Breast Canter Awareness.