Pitomuwan labus tansar panambayangan rikoton norukutan mogigiyon Labuan
LABUAN: Pitomuwan id labus tansar Panambayangan Blessed Sacrament hiti okon nopo ko rikoton mongimbadi susumambayang nga tulun labus nogi ngawi ih okon ko tutumanud id panambayangan dilo.
Minoboros ih songulun mogigiyon Sina do tikid tadau minggu isio rumikot momoli-moli id pitomuwan dilo sundung okon ko poingamung isio sabaagi puru id panambayangan dilo.
“Id pitomuwan diti koboli oku mogisusuai kinotuan om kanas koubasanan miampai gatang di miulaula, ih aiso dagangon id pasar,” ka dau.
Suai mantad mogigiyon Sina dilo okito nogi oh mogigiyon Malayu rumikot id pitomuwan dilo montok momoli-moli do kinotuan.
Pitomuwan dilo kapanau poompus mantad kosuabon gisom pitangadau ih kopohompit sambayang duwo misa, id boros Inggilis om nogi Malayu.
Kogumuan dudumagang id labus tansar panambayangan Katolik dilo nopo susumambayang ngawi id misa do boros Malayu ih hakapan diolo dadagangon ontok sumuang sumambayang.
Nga kiwaa nogi ih tumomod tumomu kopio ih okon ko susumambayang id panambayangan dilo om tumamong iyolo potomuwon gisom pitangadau.
Kogumuan dagangon id tomu dilo nopo nga taakanon om tinumon bobolion kogumuan tulun ontok opongo sumambayang montok kaakanan doungadau.
Ogumu nogi oh dagangon kinotuan kampung miampai kanas koubasanan ih aiso dagangon id pasar om nogi supermarket.