Puru Parti Warisan linohou pulis kokomoi pinitimungan 10 Okt

KOTA KINABALU: Opod om iso puru Parti Warisan Sabah koniab linohou montok udiyon pulis kokomoi pinitimungan ih pinaharo id natad Kuut Kota Kinabalu ontok 10 Oktober nakatalib.

Boros ngawi diolo noilaan do notiip id Longkod Upis Pulis Kota Kinabalu hiti montok monulung ponoriukan kokomoi pinitimungan pialatan 200 gisom 300 tulun kikotumbayaan do pinanjur di parti dilo.

Pinitimungan dilo pinaharo sabaagi tanda ‘solidariti’ kumaa boyoon komulakan om timbang porosiden parti dilo ih pinonguwungan mantad kuut montok monulung ponoriukan kes pinongusutan kousinan tulun ginumuan montok kotundaan labus kakadaian Sabah mantad Tinan Monorina Pomunsaan Susuap Malaysia (SPRM).

Pialatan ih linohou do pulis nga kumoduo porosiden parti ih nogi Puru Parlimen Penampang Darrel Leiking; kumoduo porosiden ih nogi Puru Lamin Koundangan Pogun (ADUN) Likas Junz Wong; bendahari ih nogi ADUN Moyog Terrence Siambun; om monunurat atatap Loretto Padua Jr, ih nogi luyar luminansan tulun di pinonguwungan dilo.

Ontok rumuto, Boyoon Pulis Kakadaian Tagayo Kota Kinabalu ACP M. Chandra pinapatantu do ahal dilo, nga au minongomi potilombus.

Boyoon komulakan om timbang porosiden parti dino nokomoi pinungaranan ‘Datuk’ pialatan walu tulun pinonguwungan gisom baino diti montok monulung ponoriukan kokomoi pinongusutan kousinan projik labus kakadaian kiginumu RM180 riong ilo nopo nga wookon mantad RM1.5 billion kousinan ih piaga-aga do pinongusutan mantad iso komontirian.

Kousinan RM1.5 bilion dilo nopo nga wookon poruntukan koporintaan longkod maya do iso komontirian kiginumu RM7.5 bilion montok papanau do projik labus kakadaian id Sabah montok timpu 2009 gisom 2015. -Bernama