50 natagakan tampat tiyonon, limo walai nopunso notutudan

TAWAU: Kiikira 50 mogigion natagakan tampat tiyonon id kinotutudan ih minomunso do limo walai id Kg Seri Menanti hiti, kiikira jam 10.45 kosuabon koniab.

Utusan Borneo ih kiharo nogi id tampat kinantakan nokoilo do tapui nakaanu minanamong miampai tosisikap asil pinisokodungan mogigion kampung miampai bomba, pulis om Tinimungan Gugumaga Tulun Ginumuan Malaysia (APM).

Munggui, Aisah Josep, 44, minoboros do kinotutudan dilo noilaan dau ontok susumodia mongoi daa doid Pasar Tamu Takada kalapas sinunudan di tanak dau.

“Sinunudan oku tanak ku haro lisun om owutong miagal wayar notutudan, nga ontok diri osorou ku haro tulun minonutud sampa, nga kohimayaan dilo tapui lumabus mantyad linimput.

“Kalapas diri minoi oku doid linimput id suriba lamin om minanandang longobon pogului nokoilo do tumimpuun noh tapui sumikit om au nokosiwat montok minomisok,” ka dau.

Sumusuut dilo, Aisah om puru paganakan dau ih suai tuminilombus minanampasi tinan om minaganu do surat ngawi kiguno diolo pogului luminabus mantad lamin.

Minoboros isio do aiso boros ih kaanu papagambar kumaa kinantakan taraat ih nokoimamang tinan dau sampaganakan, nga mongunsikou sabap koinsanai diolo natampasi.

“Alansan kopio oku doid bogian kikoompitan miagal Koupisan Kotundunan Rayat om lansanon rayat kaanu mindahu gana manahak do sakadai kumaa toinsanan munggui di nokoompit,” ka dau.

Boyoon Kopisan Bomba om Manampasi Zon Tawau ih nogi Boyoon Operasi Ismaidi Ismail minoboros do nokotorimo bogian dau do pamalahauan kaagaban kokomoi do kinantakan dilo id jam 10.49 kosuabon om aiso kes kinosindualan pinoruput.

Tumanud dau, tapui nakaanu minanamong kiikira 50 minit asil karaja minomisok om minanamong kinotutudan pinapanau di bomba miampai nuhupan do mogigion kampung.

“Pinagaras toou miampai tolu injin momisok tapui, 19 puru bomba om 18 puru sukarela om nuhupan nogi di popogirotkuasa suai om mogigion kampung.

“Alansan tokou do tulun togumu lobi miingatingat doulu noh ontok magansak sabap ogumu kes id watas diti kontodonon mantad kolowongon ontok magansak,” ka dau.

Ka disio, natadon tototopot om ginumu kinorugian sabap kinantakan kinotutudan dilo kakaal poh soriukon.

Okitonan mogigion kampung om bogian monguasa mogisosokodung momisok tapui kinotutudan.

Mogigion kampung om puru bomba minogitatamba mogium ralan montok momisok tapui mantad karalad.

AISAH ISMAIDI mokianu tulun togumu mooi miingatingat sumusuut koyuon tawan di au atantu id watas diti.