Ginumu pagahasan ‘maksimum’ susumikul paganakan B40 pinoinsavat RM200 lizong

KUALA LUMPUR: Kopolintaan baino pinopoboos do koluahon pomohuangan Kotinanan Tozibut Balajalan Takavas Nasional (PTPTN) miamapi pinopoinsavat pagahasan ‘maksimum’ soginumu RM200 lizong kumaa susumikul mantad paganakan tinimungan suang hamin kipandapatan 40 piatus poinsisiibo (B40) ih tumanud koos kikobulihan dagang takavas.

Minoboos Huguan Montili Datuk Seri Najib Tun Razak do timpu ‘grace period’ pambalazan mahik nohos nogi pinotihombus doid 12 vuhan kahapas naavi ponginabasan piagahon onom vuhan ontok timpu baino.

“Kahapas dino, kumaa mogogohos ngavi ih mimang mongoput ponginabasan doid boogizan potihombus, sabaagi suntu ‘diploma’ doid ‘ijazah sarjana muda’ obuli izioho popiamung do pahagasan diploma om ijazah sabaagi iso pagahasan, om momoguno noopo monoodo pambalazan mahik kahapas naavi id boogizan ijazah dino.

“Otopot kozo, mogikaakavo hivang nakataak no polinta, nung au mimang mambalai nogi, au koiho onu ih pobooson tokou,” ka Najib ih nogi Montili Kousinan ontoik pinapabantag bajet 2018 id Dewan Rakyat.

Id Bajet 2018 kituhu do ‘Memakmur Ekonomi Yang Inklusif, Mengimbang Keunggulan Duniawi dan Ukhrawi Demi Mensejahtera Kehidupan Rakyat, Menuju Aspirasi Transformasi Nasional 2050 (TN50)’ dino, pinoboos nogi di Najib do soginumu RM250 lizong doid 500,000 papaapu kiumul tuu gisom 12 toun idsuang Skim Poopion Balajalan 1 Malaysia (SSP1M) panamangan PTPTN.

Ontok pinabantangan Bajet 2017, pinoboos polinta o ‘diskaun’ balazan mahik PTPTN iho nopo nga 15 piatus montok koponguhanan noponu koinsasanai noohu tutang nohos, 10 piatus montok balazan sokuukuang 50 piatus mantad noohu tutang montok insan balazan, om diskaun 10 piatus montok balazan mahik maza putuhon gaji toi ‘Direct Debit’ tumanud Timpu Balazan Mahik (JBB) patatapon.

Pinapatahang potihombus kokomoi ‘insentif’ pongimbazatan koubasanan popoopi dino, minoboos Najib do galan kangaam RM500 maan pataako kumaa dioho ih kivaa ginumu pinaapu sokuukuang do RM500 ih obuli pohobuson songian koikot umul 18 toun.

Suvai ko iho, ka disido vagu, potihopmbuson nogi polinta o timpu kopoiduan sukai pandapatan tuhun pointantu kumaa RM6,000 montok poopion abaakas ih tinoodo doid suvang SSP1M sohinaid tohu toun tumimpuun 2018. -Bernama