Kusai nojiil siam toun minonokodung om kiharo ‘imej’ IS
KOTA KINABALU: Kuut Takawas hiti pinaparatu ukuman jiil siam toun kumaa songulun kusai kinoiyonon sabap kasalaan kiharo ‘imej’ tinimungan taraat Islamic State (IS) om minanahak sokodung.
Hakim Ravinthran N. Paramaguru pinaparatu do ukuman dino nokomoi kumaa di Aszhroy Achoi, 25, koniab kalapas noilaan kisala montok duwo panandasan dilo.
Ravinthran idsuang pinangakiman dau minoboros do timbangon disio ahal pokiinsianan mantad bogian kopongoligan om tuwa pomusarahan pangadawaan.
“Kakaal omulo ih natandasan om bulun noh kiharo id suang linimput dau songowian talipaun piowit-owit.
“Poingkuro poh nga isai-isai ih manahak sokodung kumaa tinimungan taraat mositi ontokon ukuman tawagat,” ka dau.
Kawagu dau laang natandasan nogi obuli kopongimbayat do tulun suai ih kiharo id posorili montok momonsoi ahal ih iso’i.
Kumoiso, natandasan ih toilalaan dau minanahak sokodung kumaa tinimungan IS miampai minomoguno ‘aplikasi sosial Facebook’, minomoguno ngaran Yohyo Illa’nun AlSaba Maliza.
Kasalaan dilo winonsoi ontok 5 gisom 19 Julai toun nakatalib id Kampung Kota Bungan, Ralan Kudat id watas Kota Belud.
Natandasan pinatantu nakasala tumanud Seksyen 130 J (1) (a) Kanun Koinggoritan, kopogowit do kojiil soumur-umur poimpasi toiko pinagaab minomonsoi do kasalaan dilo.
Koduo, natandasan kiharo kiginumu 44 ‘imej’ haro koompitan tinimungan dino nokomoi id suang iso talipaun, ontok 24 Julai toun nakatalib jam 10 kosuabon id Linimput Raan Poimbida Longkod Upis Pulis Watas Kota Belud.
Dinawa Aszhroy tumanud Seksyen 130 (1) (a) Kanun Koinggoritan (Akta 574), kojiil au kolobi turu toun toiko danda, om obuli momunso nonggo-nonggo barangan ih ginuno.
Panandasan koiso Aszhroy pinongontokan jiil turu toun om koduwo nontok duwo toun, goduwo-duwo ukuman papanaon insan-insan tumimpuun mantad tadau kinagakaman ontok 27 Julai di toun nakatalib.
Pangadawaan pinapanau di Kumoduo Mangadawa Tagayo Muhammad Fadzlan Mohd Noor om Syazwani Mohd Sobri.
Luyar Jamadi Salleh luminansan di Aszhroy.