Ponokotanda karaja poinsosonong
# Tinimungan pakakaraja Sedco suminain IBR, popoingkawas kopurimanan om kotulidon
KOTA KINABALU: Tumaru Koidu Susuap (IBR) ih pinapanau kaanu popoingkawas do kopurimanan om papaharo gatang kotulidon kumaa toinsanan pakakaraja Kotinanan Kotundaan Ekonomi Sabah (Sedco).
Monijor Tagayo Tinimungan Sedco Pengiran Saifuddin Pg. Tahir minoboros do laang tosonong ih pinointutun do Tinan Monorina Pomunsaan Susuap Malaysia (SPRM) dilo nogi kaanu popokito do kotopotan, komitmen kumaraja om koyuoyuon karaja di lobi awakas om koidu susuap.
“Sundung pia, ‘prinsip integriti’ om ‘akauntabiliti’ kiguno kopio om mositi torimoon om silihon do koubasanan kumaa di wookon pakakaraja kotinanan.
“Idsuang ahal dilo, kosokodung kopio oku do laang tosonong IBR om alansan kopio tuh koinsanai pakakaraja kotinanan kapanahak pisokodungan om umampai nogi monokodung karaja tolidas diti,” ka dau ontok minanahak boboroson id Abaabayan IBR Sedco hiti koniab.
Namot dilo, Ponorikohon Sedco Dato Sri Nasir Sakaran minoboros do abaabayan tumaru dno nokomoi nogi kopokito do kotopotan do pakakaraja ngawi kotinanan montok manahak kotorinaan di tosonong kopio.
“Tantu noh do papanaon tokou IBR doid potitikid bogian siriba montok popokito do kopomuruanan bogian poingkakawas Sedco nakapanahak noh suntu di tosonong kopio,” ka dau.
Kumoduo Potunud Pomunsaan SPRM Zulkefle Abdul Hamid minoboros do gisom baino diti kiginumu 73 agensi mantad mogisusuai bogian misosondiri kaamung noh komponi kikoompitan porinta (GLC) tuminaru nogi.
“Miagal ih pinoboros tokou pogului diti, IBR winonsoi di kopomuruanan tinan om pakakaraja diolo miampai popoobi winakas karaja tumanud katabayan sosongulun dilo.
“Alansan tokou kopio kumaa diolo ih pinapaharo IBR popoturuk do nunu ih pinabatos, ilo nopo nga lobi kitonggungan papanau do karaja om minsodu tinan mantad momonsoi susuap,” ka dau.
Pogului, kiginumu 13 tulun mantad puru tinan potunud om ponorinaan poingkakawas Sedco uminampai tumaru id abaabayan dilo.