Bajet 2018: Lobi RM6.8 bilion montok Sabah om Sarawak
KUALA LUMPUR: Koburuon om kolumaagan mogigion labus kakadaian id Sabah om Sarawak kotilombus kaanu pongintongan tagayo Luguan Montiri miampai lobi RM6.8 bilion poobio id suriba Bajet 2018 montok papanau do mogisusuai projik kotundaan.
Datuk Seri Najib Tun Razak, ontok pinapabantang do Bajet 2018 id Dewan Rakyat koniab, pinopoboros do kiginumu RM1 bilion maan posodiao montok Sabah om RM1 bilion kagu montok Sarawak montok tujuan monginsonong sikul ngawi nangaraag maya Sistom Linominon Kipomorunan (IBS).
Ka dau, iti nopo nga poruntukan poinggagayo ih posodiaon do porinta montok tujuan dilo.
Tumanud dau, kiginumu RM2 bilion maan poobio montok projik Laburraya Pan Borneo.
Minoboros isio do koinsanai 11 pakej pamansaian id Sarawak nabahagi noh om limo mantad 35 pakej Fasa Koiso id Sabah notingadan noh, om 12 kagu id poindalanan ‘tender’.
Minoboros Luguan Montiri do RM1 bilion kagu maan poobio maua Tinan Monorina Komunikasi om Multimedia Malaysia (SKMM) montok popotounda do kounalan piturubungan om kounalan garis talaab (jalur lebar) id Sabah om Sarawak.
Ka dau, soosomok RM500 riong maan poobio montok tujuan projik kotundaan ralan labus kakadaian id Sabah om Sarawak, om RM620 riong kagu montok projik kapanahakan lotirik id goduwo-duwo pogun dilo ih kopogowit doti do asil kumaa 10,000 lamin labus kakadaian.
“Kiginumu RM300 riong nogi posodiaon montok kapanahakan waig tolidang ih kopoompit do 3,000 lamin id Sabah om Sarawak, ka dau.
“RM50 riong poobion montok pamalanan om ponukatan tana ngawi adat, ilo nopo nga RM30 riong montok Sarawak om RM20 riong montok Sabah,” ka disio.
Abaabayan Kopiagalan Gatang Barang Kogunoon id Sabah om Sarawak nogi maan potilombuso miampai poruntukan kiginumu RM80 riong id suriba Bajet 2018.
Suai ko ilo, montok popoinggumu do kapaapuan, padagangan om pomorunan, noboros di Najib do poruntukan psodiaon montok momonsoi ralan sumuang doid Wokok Baleh id Sarawak.
Mamalan nogi porinta montok momonsoi wagu tutubpoon kapal tumulud Mukah om pongingayaan Tutubpoon Kapal Tumulud Sandakan.
“Montok popoinggumu do kotundaan id Labuan, momonsoi doti porinta do ponoriukan obuli papanaon montok momonsoi sunsuyon popiromut do Labuan miampai tana tagayo id Sabah,” ka dau.
Tinimungan suang lamin kipandapatan tosuriba (B40) id Sabah om Sarawak nopo nga pialatan 600 unit lamin pointongkop pogun ih kotorimo doti do asil pomulaminan id suriba abaabayan ‘My Beautiful New Home’ toiko ‘MyBNHomes’ , ka Najib.Bernama