Posodia tumoguang timpu mogompus
# JBPM monuhu toinsanan pogun momogonop ‘logistik’, koumatan
KOTA KINABALU: Aparagat o Koupisan Bomba om Manampasi Malaysia (JBPM) momonsoi koposodiaan tosikap montok tumoguang do kaantakan toiko kaantakan taraat kinoiyonon ontok timpu mogompus (rumasam).
Kumoduo Boyoon Potunud (Operasi) JBPM Datuk Soiman Jahid minoboros do kopomongoan dilo kaamung noh monuhu do toinsanan potunud pogun om boyoon balai momogonop do toinsanan ahal miagal ‘logistik’, kopuruan om koumatan panampasi.
“Koubasanan nopo, kowolihan koyuon tawan om timpu mogompus (rumasam) ih antakan ontok wulan (Oktober) gisom (Disember) manahak ponokialitan tagayo kumaa puru bomba hinonggo kaantakan taraat asaru antakan om momoguno do papanau karaja manampasi tosisikap.
“Sokiro ko antakan, maganu tokou laang tosisikap miagal popokodou suti puru montok papanau karaja kaamung noh monuhu diolo momonsoi ponoriukan id bogian di asasaru oimangan kaantakan taraat miagal liud montok popoindalan aiso tulun om popoundaliu munggui lobi tosikap,” ka dau.
Noboros dau ahal dilo id pitimbungakan abar kalapas pinotimpuun do Abaabayan Kapawakasan Kaangaian Tosonong Boyoon ngawi Zon JBPM Pogun Sabah om Watas Pisompuruan (WP) Labuan Timpu 1 2017, hiti koniab.
Minoboros Soiman do JBPM momonsoi koposodiaan tosorisid mantad ahal kounalan kakamot miagal bot om lori panampasi montok popoindalan kopowolihan om kim pongiyanan mooi lobi gunoon miampai tososonong.
Ka dau kiginumu 50 tulun kaampai mantad boyoon zon om balai om upisor wanan JBPM Pogun Sabah om WP Labuan uminampai do abaabayan ih papanaon solinaid tolu tadau tuminimpuun koniab.
“Gaab tagayo abaabayan nopo nga manahak do kopointalangan ahal ngawi insan timpu om panalasaian ih kiguno papanaon id bogian balai om zon.
“Pialatan ahal ih noonitan dilo kikompitan karaja ngawi papanau kaparagatan om kobolingkangan di notoguang potitikid balai kamaung noh ponorinaan kaantakan taraat,” ka dau.
Namot dilo, Potunud JBPM Pogun Sabah Nordin Pauzi alansan kopio laang tosonong dilo kaanu popoingkawas do koposodiaan JBPM pogun diti montok tumoguang do nunu noopo kaantakan taraat kinoiyonon ontok soira-ira timpu noopo.
Ka dau JBPM momoguno kopio ‘input’ mantad pikunsian toinsanan pogun sabap bogian diolo au magandad onu noopo kaantakan taraat toiko kaagaban, om gumura nogi monimung kopoilaan om toilalaan.
“Toinsanan ‘input’ ih notimung maan onitai om soriukon, kalapas dilo momonoi ponginsanangan kotorinaan tokou id pogun diti,” ka dau.
Nokotindapou nogi ih Ponulung Boyoon Potunud Bogian Ponoriukan Kotutudan JBPM Edwin Galan Teruki.