Kusai kinoiyonon tinaan pulis sabap kiharo syabu om eramin 5
BEAUFORT: Pulis minanaan songulun kusai kinoiyonon miampai 13.39 gram dadah kawo syabu om songinan eramin 5 id iso pinonugkuan id iso malai aiso numbur id Kampung Tidong Kuala Penyu hiti di kosuabon tadau Koonom.
Boyoon Pulis Watas Beaufort Deputi Superintendan Azmir Abd Razak minoboros do suspek kiumur 35 toun dilo tinaan kiikira jam 9 kosuabon.
“Minaganu laang miampai kopoilaan di notorimo mantad tulun ginumuan, sontimungan puru Bogian Ponoriukan Jinayah Narkotik (BSJN) Longkod Upis Watas (IPD) Beaufort ih binuruan di Inspektor Ng Chai Sing pinapaharo do pinonugkuan id tampat di pinoboros.
“Soira nopo sinugkuan pulis minanahan songulun kusai ih kiharo id suang lamin dilo id koyuon mosi-rosi om kikotumbayaan do nokoompit id suang kaparagatan dadah,” ka disio.
Minoboros isio do pinomorisaan potilombus kuminaa suspek nokoilo do kiharo dadah kawo syabu om eramin 5 ih piaga-aga do kigatang RM1200 poingigit suspek.
Kawagu dau nokokito nogi pulis do koumatan ih kikotumbayaan do gunoon montok papanau do kaparagatan panagian dadah.
“Suspek kalapas dilo nowit doid IPD Beaufort montok soriukon tumanud Seksyen 39A
(1) Akta Dadah Koligogon 1952.
“Asil pinoniisan waig sobu nogi nokoilo suspek ‘positif dadah’ kawo syabu om amphetamine,” ka disio.
KOUMATAN ih gunoon montok papanau kaparagatan panagian dadah. Gambar wanan, dadah ih nahau mantad suspek.
Tumanud dau ponoriukan potilombus nokomoi kes kakaal papanaon miampai tosoriuk montok mongilo nung kiharo suspek suai idsuang kes diti.