Au tuminanud koturan totopot lisin, apat bot pukat tunda tinaan

KOTA KINABALU: Apat bot pukot tunda tinaan kalapas noilaan minamagakom sada okurang mantad tolu batu nautika mantad bogian tindal.

Potunud Maritim Watas Kota Kinabalu Laksamana Pertama Maritim Adam Aziz minoboros do kaparagatan bot dino nokomoi pinopoompit do bogian okurang mantad tolu batu nautika id kawaigan Papar om Tuaran.

Tumanud dau, Agensi Popogirotkuasa Maritim Malaysia (APMM) hiti nokoilo kaparagatan dino nokomoi ontok pinapanau ‘Ops Khas’.

“Bot Mimpanau Maritim nokoilo apat bot pukot tunda id koyuon mosi-rosi kiikira jam 11 gisom 11.50 dongotuong tadau Kolimo.

“Asil pinomorisaan, bot pukat tunda dilo minogowit kiginumu 20 tulun kru kaamung tekong id bindurugan umur 23 gisom 53 toun.

“Koinsanai diolo kopoompit do songulun rayat Kinoiyonon, tolu tulun Filipina om 16 tulun Indonesia,” ka dau id kopoilaan hiti di tadau Koonom.

Minoboros Adam do kaapat-apat bot dino nokomoi tinaan sabap au tuminanud koturan totopot lisin id suriba Akta Ponginsadaan 1985 ilo nopo nga mamagakom sada okurang mantad tolu batu nautika mantad bogian tindal.

Ka dau koinsanai kinagakaman kaamung bot om asil sada kiginumu 270 kilogram (kg) nowit doid jeti Maritim Sepanggar montok ponoriukan potilombus.

Minoboros isio do kinagakaman dilo nogi nakapasanang do katangaban tinimungan monginsada id bogian Papar om Tuaran.

Tumanud dau, potilombuson papanau operasi dilo montok mangantob kaparagatan bot ngawi mamagayat ih mamagakom sada okurang mantad tolu batu nautika mantad tumilombus ‘minggagayo tulu’.

“Maganu nogi Maritim Malaysia do laang tokodou kumaa mongindapu bot ih maganu kosiwatan sumuang bogian zon mamagakom sada toiko kasalaan suai ih kadandang do koturan totopot lisin.

“Toinsanan mongindapu bot monginsada mositi do tumanud koturan totopot lisin.

“Poingaton ku nogi tuh toinsanan mongindapu bot au momoguno do kountungan noopo gisom kontodonon do kotos sada opunso om koingkudi,” ka dau.