Lobi ,6000 puru Sabah ruminijisto ‘Sahabat Gerah’ SPRM
KOTA KINABALU: Lobi 6,000 puru Sabah ruminijisto sabaagi ‘Sahabat Gerakan Revolusi Anti Rasuah’ (Gerah) mantad podi Tinan Monorina Pomunsaan Susuap Malaysia (SPRM) minonimpuun do abaabayan dilo toun diti.
Kumoduo Potunud (Operasi) SPRM Sabah Hasbilah Mohamad Salleh minoboros do Gerah nopo nga kopoinsomokan om laang tosonong SPRM montok mokianu kopoomungan do tulun ngawi songkoiyonon montok sumiliu ponoko mato om tolingo agensi dilo om nogi songowian ngawi papanau do tonggungan kiguno montok manangod kaparagatan susuap om kasala momoguno kuasa.
“Idsuang ahal dilo, minggisom yahai (SPRM) maganu do lobi ogumu kopuruan id pialatan tulun ngawi songkoiyonon id Sabah miampai kalansanan do koilo iyolo om tumilombus manahak sokodung au opipuwo kumaa SPRM montok momunso kaparagatan susuap.
“Tonggungan om kopoompitan tulun ngawi id pogun diti sabaagi laang montok momunso susuap kiguno kopio montok monulung SPRM kapaganu do kopoilaan (kokomoi susuap om kasala momoguno kuasa) sabap tulun ngawi lobi koilo do kobolingkangan di antakan id posorili diolo id upis nangku toiko id kampung,” ka dau.
Noboros disio ahal dilo ontok romuto do monunurat abar pogului pinopoidu do 10 padsakaian 4WD mampayat konvoi ‘Program Mesra Rakyat Kembara Jelajah Anti Rasuah’ (Kejar) 2017 id Upis SPRM, doros 1Sulaman, hiti koniab.
Kejar nopo nga abaabayan mindau gana SPRM montok minsomok rayat suai ko ‘platform’ paparayat ‘mesej antirasuah’ om kasala momoguno kuasa kumaa tulun ngawi om monuduk diolo tuh lobi katama rumikot momonsoi ruputan om manahak do kopoilaan kumaa agensi dilo.
Minoboros Hasbilah do abaabayan dilo nakanu pangaramitan kopongunsub kopio montok pinanganjuran dilo pogului diti soira nokopongintong do kinorikotan ogumu kopio id pialatan mogigion id watas nokoompit om nogi ponokotanda do kopurimanan tulun ngawi kokomoi kopomunsaan susuap maid-laid mingkawas.
“Nokoilo nogi yahai do tulun ngawi nokotimpuun nodi katama rumikot montok momonsoi ruputan om manahak do kopoilaan (susuap om kasala momogunokuasa) kumaa SPRM maya mogisusuai koluyungan do rumikot sondiri doid upis nangku toiko maya talipaun om email,” ka dau.
Abaabayan Kejar ontok baino diti gumura doid Kampung Simpangan,
Tuaran miampai mogisusuai kaparagatan pohoroon kaamung noh abaabayan osuau rayat om sumain tumaru rayat manangod susuap id kain pawaladon suai ko kapanahakan toluod okitonan barangan kogunoon tikid tadau kumaa tinimungan momoguno. -Bernama