Natangkangau luang ‘misteri’

# Pinatantu pulis do aiso waya kinopoobusan toiko pinongoluangan

KUDAT: Kinokitonan luang kiginayo kiikira sakaki toiko 12 insi id tanga Ralan Kampung Rampai Marabau hiti di kosuabon koniab okon pinapatangkangau do mogigion kampung dilo noopo, nga nokopongimbulai nogi do ponguhatan di au poh nosimbar gisom baino.

Boyoon Pulis Watas Kudat Superintendan Douglas Taong minoborosdo nakaanu o bogian dau do kopoilaan dino nokomoi id jam 8 kosuabon pogului pinapaharo do pomorisaan id tampat kinokitonan miampai timpu di tosikap.

“Asil pinibarasan miampai songulun mogigion kampung nokoilo do nokokito isio do babang anawau miagal waya kinopobusan bodilan kiikira jam 2 minsusuab pogului nokoilo haro garisan opurak miagal waya lisun id tawan.

“Mogigion dino poingkuro poh nga au koilo do babang dino luminabus mantad suang tana nangku toiko mantad tawan,” ka disio ontok romuto koniab.

Ka disio, tandasan do mogigion kampung do haro o luang/ruhak id koiyonon dilo miampai korolomon di au poh noilaan.

“Soira nopo nintongan miampai tosoriuk aiso nunuunu waya kinopobusan toiko pinongoluangan poingoros luang/ruhak dino om tolig tana id luang dino nopo nga aalus miagal minomonsoi luang.

“Suriba tana id luang dino nokomoi

Koyuon luang miampai aiso waya pinongoluangan toiko kinopoobusan om tolig tana di anatau miagal pinongoruakan.

kikotumbayaan do kiburutak/kirana sumusuut waya tana noyopos id pompod kayu pananda ih pinataru id suang ruhak dilo,” ka dau.

Minoboros ih Douglas do tutuban do bogian dau o wookon mantad koiyonon ralan minomoguno ‘kon’ sumusuhut tampat dino nopo nga pialatan ralan tagayo ih gunoon do mogigion kampung.

Kawagu dau, nokosunud nogi do bogian dau o kinantakan dilo kuminaa bogian Koupisan Talun Alun (JKR) om bogian Geologi montok mongilo onu totopot ih nantakan.

“Pinosorou ku nogi o mogigion kampung om tulun togumu tuh au otombirangan miampai kabar tongus ih minoboros do kiharo barangan kigatang id suang luang diti.

“Obuli ogi koligogon ahal diti kumaa tulun togumu ih mongoruhak doti do luang dilo miampai poingkadaada (au oilaan) gisom obuli koponinduol do tinan sondiri kaamung noh ountunan id suang luang dilo,” ka dau.

Namot dilo, Tabaal Geologi Universiti Malaysia Sabah (UMS) Prof Dr Felix Tongkul ontok romuto minoboros do luang dilo kikotumbayaan do nokoimbulai sabap noimangan gonit.

“Koyuon luang ih pinahasil dilo kobilangan kopio om nung intongan miampai tosoriuk koyuon diti nokoumbal nantakan id watas suai kaamung noh id Wichita Kansas.

“Lisun ih nintongan di mogigion kampung dilo waya doti mantad noimangan gonit miampai cas lotirik akawas om luang diti miagal ko noimangan do gonit.

Kawagu dau, waya noimangan gonit id sawat tana nopo nga ahal koubasanan nga onu ih kagayat id kinantakan diti nopo nga waya noimangan gonit id sawat tana ih kobilangan om ino nopo nga kinantakan koiso ih noilaan gisom baino diti kawagu nga haro saksi ih nokokito do kinantakan diti.

Tumanud dau, luang diti obuli silihon sabaagi tungkusan kinoiyonon nga ino kiharo id tanga talun alun.