Kopohobusan internet EPF maza do e-Pengeluaran
KOTAKINABALU:Montokmonguhan kobohingkaangan pinopoopi ngavi, pinopointutun oh Tinimungan Kopoopian Usin Pakaakalaja (EPF) do iso po vagu kalahanon montok manakadai dioho monoina do usin pinoopi, hobi po montok kopohobusan usin.
Itia nopo e-Pengeluaran nga manaak kasagaan kumaa pinopoopi ngavi momoguno do i-Akaun dioho montok mangapalai papahabus do usin dioho maza do internet koupisan EPF.
Maza do kalahanon diho, timpu tahaid miaga di poguhu montok papahabus do usin EPF aangazan nodi monoina miampai timpu toluai.
“Komozon nopo diti, e-Pengeluaran nopo nga iso kalahanon mangapalai papahabus do usin miampai do au momoguno sinuatan ngavi. Kotoinaan e-Pengeluaran nopo nga manakadai pakaakalaja mangapalai kopohobusan usin maza do internet.
“Sosonguhun dii obuli mangapalai do e-Pengeluaran maza do internet koupisan EPF. Poingkuo po nga pokionuon po haid izioho mokilijistol doid i-Akaun poguhu ih do momoguno kotoinaan internet e-Pengeluaran,” ka di Huguan Koupisan EPF Pogun Sabah, Izzriyana Kamalia Abdullah ontok pinituubungan miampai The Borneo Post.
Gontob koiso do kotoinaan ePengeluaran nopo nga pinotimpuun di ontok 30 Jun 2013, id nombo tinompuuan do ontok dii nopo nga kopohobusan usin montok popoinsiibo ginumu kousinan nohos (D8) om nogi kapambalazan tikid vuhan usin nohos pinomohi do hamin (DM).
Suminusuut dii, ontok 5 Julai 2015, pinoinggazo po kavagu do EPF oh kotoinaan dau kapaampai kopohobusan montok momohi toi ko monuidong do hamin (D5). Om di kavavagu, ontok 21 Disember 2016, pinoinggazo po kavagu oh kotoinaan miampai minanaak kasagaan kopohobusan usin montok ponginabasan doid hongkod balajalan takavas.
Tumanud dosido, e-Pengeluaran nopo nga iso mantad piipio haang do EPF montok popointutun kopomogunaan do i-Akaun. Iho nopo nga iso mantad ginumu-gumu do kotoinaan EPF maza do internet.
Komozon nopo diti, i-Akaun nopo nga iso akaun pakaakalaja id suang internet do EPF. Maza do akaun diho, sosonguhun pakaakalaja dii kotoimo do nunu nopo kotoinaan EPF maza do internet.
“Songian toodoon ih apalai momoguno foom miampai sinuatan ngavi, osusa tokuudi monimung ngavi di dokumen. Ahapas ii mugad po di kavagu doid upis EPF montok momii nung nogonop ko au oh toinsanan dokumen dii. Ana’u timpu gunoon mangapalai maza kalahanon diho.
“Ingkuo po, itia e-Pengeluaran nopo nga manaak kozo do kouhanan. Buli komozon do aangazan monoina isoiso apalai doid nombo nopo,” ka vagu disido.
Pinointahang nogi di Izzriyana do kalahanon mangapalai maza do ePengeluaran nopo nga noikot kozo do ouhan.
“Bii’o no mai, miaga ko nakaanu ko do kapaahasan usin sumikul mantad Tozibut Balajalan Takavas Kabansaan (PTPTN) om timpu mambalai nga noikot nodii. Maza do e-Pengeluaran, kaanu ko papahabus kapambalazan diho mantad doid daamin nu.
“Ii nopo maan nu nga poposuang nopo do kointahangan maza do internet. Nung baabaino diti, kiva usin nohos nu mantad PTPTN, misondikot no ino do oihaan doid suang internet EPF. Ihoon nopo do kiva no i-Akaun nu. Oihaan iho mantad no do oinsanan kointahangan nu kokomoi do usin nohos mantad PTPTN poinsuang doid internet EPF.
“Poingkuo po, ahapas kapanau nu oh apalai maza do internet, kakal pokionuon ko mugad doid upis EPF montok mongintutun do tanda tuntuu. Iho nopo nga montok mongintopot do iziau no kozo ih minangapalai,” ka di Izzriyanan pinopoiho miampai pinopointahang do timpu gunoon papahabus usin nopo nga pikiikio do 15 tadau.
Kokomoi do apalai au pointopot, minoboos isido do e-Pengeluaran nopo nga manaak kozo kopoguhuanan kokomoi do koumohigan kopohobusan usin.
“Komozon nopo diti, e-Pengeluaran nopo nga iso kalahanon mangapalai papahabus do usin miampai au momoguno do sinuatan ngavi. Kotoinaan e-Pengeluaran nopo nga manakadai pakaakalaja mangapalai kopohobusan usin maza do internet.