‘Junjung Ilmu Kitani’
# Projek SMK Sindumin lumansan Sabah id pialaan Petronas AAY
SIPITANG: Projek ‘Junjung Ilmu Kitani’ Sikul Pintangaan Kabansaan (SMK) Sindumin monimban linominon nokologos nosiliu panambasaan buuk ‘mini’ lumansan Sabah monongkibai id pialaan panantaban Petronas All About Youth (AAY) id Kuala Lumpur, ontok tadau Kaapat diti.
Ilo sumusuhut kinalantaian sikul dino nokomoi nakamanang pialaan nayatan pogun ih pinaharo id wulan nakatalib.
Kiginumu 20 susumikul Tingkatan Empat SMK Sindumin pohibokan doid longkod pogun koniab songowian duwo mongingia mongowoyo, montok monongkiala id bogian kabansaan ih poposodia do wawa tusin tunui RM50,000.
Poinsandad mantad iso masjid ih ginuno ontok 1975-1980 om kalapas dilo siniliu do sikul agama (19802011), ilo nosiliu linominon nokologos solinaid limo toun pogului susumikul SMK Sindumin minaganu laang tosonong minonimban linominon dilo nosiliu panambasaan buuk ‘mini’.
Ngaran ‘Junjung Ilmu Kitani’ (JIK) nopo nga pamaraaitan id Boros Kedayan, ih ponogi mogigion komuguam Sindumin, ih kirati do ‘Pondok Ilmu Kita Bersama’ om ilo baino diti nosiliu linominon di kiguno kopio montok mogigion songkoiyonon, doulu noh kumaa susumikul ngawi.
Ilo sabap panambasaan buuk watas poinsosomok nopo nga Kakadaian Sipitang, kisinodu 23 kilometer piwolitan dilo, ih koponginggorit do susumikul rumikot sabap aiso padsakaian tulun ginumuan id kakadaian Sindumin, ih kipiwolitan Sarawak om longobon sumuang tagayo tulun ngawi rumikot mantad Pogun Brunei Darussalam om Kalimantan, Indonesia.
Ontok tadau Minggu, projik JIK nokoponurat susuian soira iso pihubayaan (MOU) pinisainan pialatan tolu bogian montok tujuan kapanahakan tana linominon nokologos dilo, pialatan SMK Sindumin miampai Tinan Koburuon om Koumoligan Kampung (JKKK) om sanganu tana dilo.
Ilo sinainan di Molohingon Sikul SMK Sindumin Zulkifli Hj Kassim, Ponorikohon JKKK Anuar Hj Ibrahim om sanganu tana Abdul Manan @ Shaminan Hj Taba.
Abaabayan dilo sinaasi di Puru Parlimen Sipitang ih ponogi Potunud Yayasan Sabah Datuk Sapawi Hj Ahmad.
Kopinamot abaabayan dilo, 20 susumikul nokoompit pinapaharo do pokitonan poimbida montok poposusui do susuian om pindalanan karaja diolo ‘manampasi kawagu’ linominon ih pogulu laid kopokoruol mato mongintong kokikitanan hilo.
Misokodung JIK miampai Panambasaan Buuk Pogun Sabah raan Sipitang ih kaakun manahak do 200 tinan buuk potitikid tolu wulan. Pokimamaan timpuuni nopo nga 200 tombului korikot sombulan nosigampot noh, om baino pangaramitan maid-laid kopongunsub kopio.
Id boboroson disio id abaabayan dilo, kapamagatang kopio ih Sapawi miampai pinonginwaguan (inovasi) om ‘kreativiti’ susumikul SMK Sindumin minonimban do linominon nokologos nosiliu longkod pomoruhangan toilalaan ih kiguno kopio.
Ka disio, laang tosonong irad dilo okon noopo kaanu monuang timpu susumikul miampai kaparagatan ‘ilimu’ om minsodu kowudsu miampai nunu noopo kaparagatan di au olidas, om nogi lobi kiguno kaanu poposoribau do sinakagon pamalapau, Transformasi Nasional 2050 (TN50).
“Pogun momoguno do tulun kiguno kitoilalaan om kipalajaran montok sumiliu tumungkus kopomuruanan timpu tabantalan,” ka disio.
Mikuo minoboros do sokodung kumaa karaja ih pinoburu di susumikul dino nokomoi, muhang ih Sapawi do molohing papataru do kopotundaan balajaran tanak ngawi sabaagi onuan pongintongan poimponu montok mamajamin timpu tabantalan.
Ka disio, balajaran nopo nga kapaapuan kigatang, om poomungon sabaagi pialatan ahal kiguno idsuang ahal kotundaan pogun.
Minoboros isio do JIK kangaam kopio sabaagi longkod kopoingkawasan toilalaan sabap do korikohonon Sindumin id tiyonon di kangaam kopio longobon sumuang pogun doros suai mantad Sarawak.
Namot dilo, Zulkifli ontok romuto minoboros do kapamagatangan kumaa Sapawi minanahak do sakadai om toluod montok papalantoi do iman-imanon projik JIK dilo.
Isio ih pohibokan doid Kuala Lumpur ontok tadau Kaapat diti minoboros do sokodung kumaa projik susumikul dau dilo ponokotanda do kikoinsamadan Sapawi kumaa agenda balajaran rayat montok koburuon ontok timpu tabantalan.