Muhang PBS koporintaan Pisompuruan manahak pongintongan tototopot ‘hak Sabah’ : Pairin
PENAMPANG: Parti Bersatu Sabah (PBS) muhang tolu ahal tagayo possuulon do parti dilo maya do ‘‘memorandum’ kumaa Komiti Pogun Sabah kokomoi do ‘HakHak Sabah’ idsuang Pisompuruan Malaysia om ‘memo’ kumaa Luguan Montiri Datuk Seri Najib Tun Razak onuan pongintongan tototopot, ka di Porosiden parti dilo Tan Sri Joseph Pairin Kitingan.
Minoboros ih Pairin do ahal tagayo pinosuul dilo nopo nga ‘hak-hak’ poinsurat idsuang Pibatasan Malaysia 1963 (MA63) kapaamung do ‘Borneonisasi’ om kopoinsiribaan kuasa suai ko poposuang do susuian pinonuridongan Malaysia do id suang sukatan balajaran id sikulan.
“Kotoguang yahai atag, koinggoritan om au asantaban ginawo posuulon kumaa komiti songowian id bogian Pisompuruan om onuan do pongintongan tototopot,” ka dau id pason kotimpuunon id abaabayan pinonimpuunan Pitimbungakan Lalansaonon Tounan PBS ko-32 id Dewan Hongkod Koisaan KDCA, hiti koniab.
Abaabayan dilo pinotimpuun di Luguan Montiri ih nogi Ponorikohon Barisan Nasional (BN). Nokotindapou nogi ih Boyoon Montiri Tan Sri Musa Aman ih ponogi Ponorikohon BN Sabah om Kumoduo Porosiden PBS Datuk Seri Dr Maximus Ongkili ih nogi Montiri Teknologi Otomou om Waig.
Minoboros ih Pairin do sundung pia palantikan upisor wanan kotorinaan tulun ginumuan id pialatan rayat Sabah maidlaid osonong, nga muhang isio lobi ogumu kagu rayat Sabah monuang karaja dilo kaamung idsuang tinan haro kooturan, komponi kikompitan porinta om universiti kinoiyonon id Sabah toiko Semenanjung.
“Iti nopo nga kangaam kopio miampai jaminan ‘Borneonisasi’ om nogi katanud miampai iman-imanon timpuuni Pisompuruan Malaysia idsuang MA63,” ka dau, om minanamba do norikot nodi timpu do lobi ogumu rayat Sabah lontikon om posuangon idsuang Skim Kotorinaan Upisor Monorina om Diplomatik, susumangod om pulis,” ka dau.
Kumoduwo Boyoon Montiri dilo minoboros do komiti PBS nokoponoriuk noh ahal pinabatos idsuang MA63 kokomoi ahal pamahagian kuasa suai ko mangatag do laang ponundolian montok monginotng kawagu ‘hak-hak’ apatut do aanu Sabah kaamung kikompitan kararalanon ponorinaan kuut takawas id Sabah om Sarawak.
Muhang nogi PBS do koporintaan Pisompuruan monimbang monginsonong om popiirad do kopoilaan susuian pinonuridongan Malaysia idsuang ‘silibus’ balajaran pogun kapaamung do Ruputan Suruhanjaya Cabbold; 20 ahal Sabah om 18 ahal Sarawak, Komiti Pialatan Porinta om MA63,” ka dau.
Tumanud dau, kopoilaan kokomoi do pinonuridongan Malaysia idsuang buuk teks susuain sikul posodia haro baino oindamaan oniba, om miampai koponginsonongan dilo sinakagon timpu rumikot lobi karati om mamagatang do pinonuridongan pogun.
Id ningkokoton kikompitan, minoboros ih Pairin do osonong nogi koponorimaan PBS om koponokodung toinsanan karaja mogisusuai bogian doulu noh mantad parti pikoruhangan BN montok rayat popoguli kawagu ‘hak-hak’ rayat Sabah miagal pinatatap idsuang MA63.
Minoboros ih Pairin do rayat Sabah obuli mogiboboros do ahal MA63 miampai poingukab ontok ponorinaan Najib, nga, ahal dilo misuai ontok timpu ponorinaan Tun Dr Mahathir Mohamad sabap MA63 anggapon ‘sensitif’ om rayat Sabah kopuriman orosian mogiboboros ahal dilo sabap laang maan onuon miampai manahan diolo id suriba Akta Koumoligan Suang Pogun (ISA).
“Ontok timpu diri, aiso tiyonon om kosiwatan mogiboboros ahal (MA63) miampai poingukab. Nga, monongkotoluod PBS kumaa luguan montiri (Najib) sabap isio okon noopo minomunso ISA, katapi nogi poinsodia mokinongou pongimbarasan toiko katangaban rayat Sabah nung haro nonggo-nonggo koobian pibatasan Malaysia ih nasalaan pinaparati.
Otumboyo nogi PBS om otumbayaan luguan Montiri (Najib) do au monolikud toiko au momoduli do ‘hak-hak’ Sabah idsuang Pisompuruan Malaysia nga luguan montiri toririmo kikosianan om kinoinsamadan montok manalasai do ahal dino nokomoi miampai otoonong maya do pirundingan,” ka dau.
Odsuang ahal dilo, nuhot nogi di Pairin om laang Dr Mahathir ih miampai minonigowo mamatos do monoriuk ahal dilo ontok timpu baino nga otopot nopo ontok mongigit karaja sabaagi luguan montiri solinaid 22 toun au insan momonsoi ahal irad dilo.
“Nokuro au isio minaganu laang ontok kikuasa? Iti ponokotanda do agenda tagayo Dr Mahathir nopo nga montok monulung parti pambangkang magapon undi ontok pomilian tagayo ginumuan timpu rumikot. Au oku otumbayaan aulid ginawo disio idsuang ahal diti,” ka dau. - Bernama