Longkod momoguno tokuudi timpu
# Monoriuk kopointarangan koundangan MA63 - Najib
KOTA KINABALU: Koporintaan Longkod momoguno do tokuudi timpu montok monoriuk kopointarangan koundangan idsuang Pibatasan Malaysia 1963 (MA63) pogului maganu nuununu laang sumusuhut montok kogunoon kopio rayat Sabah.
Minoboros ih Luguan Montiri Datuk Seri Najib Tun Razak do iso pitimbungakan maan pohoroo id pialatan koporintaan pogun om pisompuruan sokiro ko haro kookunan momuruan hiti om koporintaan Longkod.
“MA63 momoguno do tokuudi timpu sabap do kopointarangan toiko ‘interpretasi’ mantad kawo koundangan ih momoguno do boros iso ginawo momuruan hiti om koporintaan Longkod. “Aiso gaab ku maganu ‘hak’ rayat Sabah, nung ‘‘aanu’ gulu poh, apatut poguluion tokou. Iti nopo nga padamaan songowian, okon PBS noopo.
“Mikunsi oku ‘sentimen’ dilo om kada kotongob sabap nung muhang mamarait MA63, au oku poposuang isai-isai id suriba ISA (Akta Koumoligan Suang Pogun), ISA nga aiso nodi baino,” ka dau ontok pinotimpuun do Kongres PBS Ko-32 hiti koniab.
Minoboros isio do porinta id suriba buranan dau au insan kigaab montok magau ‘hak’ Sabah maya MA63 om mamatos do popoguli ‘hak’ dilo kumaa Sabah sokiro ko ‘naanu’ noh ontok gulu poh.
Namu-amu nogi di Najib o kopoilaan di songulun mantad momuruan pambangkang di kawawagu ih minomonsoi kopoilaan montok monulung Sabah om Sarawak kaamung noh sumodia monoriuk kawagu MA63 nung pakatan pambangkang kamanang Pomilian Tagayo Ginumuan ko-14 (PRU-14).
Ka dau tulun dilo monguasa soliniad 22 toun nga aiso nunuunu karaja ih totopot montok popoburu Sabah.
“Katapi ontom baino diti, ‘tulun dilo’ muhang monulung...nung muhang momonsoi, wonsoyo noh ontok haro kuasa om okon baio aiso kuasa om muhang momonsoi nogi,” ka dau.
Tumanud dau, mantad podi pinomorintaan disio, ogumu poruntukan pinolulus montok kotundaan Sabah doulu noh idsuang bajet 2018.
Ka dau, muhang isio popotopot onu ih au winonsoi di Tun Dr Mahathir kumaa Sabah om Sarawak ontok nosiliu Luguan Montiri solinaid 22 toun gulu poh.
Minoboros ih Najib do piwolitanan kotundaan Sabah om Sarawak miampai Semenanjung mositi punsoon, nga kotumboyo ilo maganu tokuudi timpu.
“Piwolitan ih haro sabap di Tun Dr Mahathir pogului diti au minomonsoi irad dilo gisom natadon do haro pisuaian okito kopio idsuang ahal dilo,” ka dau.
Id iso pitimbungakan abar, pinatarang di Najib do nakaakun noh koporintaan Longkod popolulus do kousinan papasanang ralan kiginumu RM500 riong kumaa kotundaan projik ‘eco-tourism’ id Tanjung Aru.
Ka dau, kousinan dilo maan gunoo montok kotundaan om ralan nopo dilo nga pabalanjaon pogulu laid om kalapas dilo koporintaan Longkod mamaganti do kabalanja dilo.
“Iti opo nga sokodung koporintaan Longkod kumaa projik dilo ih siniliu do poguluonon do koporintaan pogun sabaagi projik mamagayat tutumombului ngawi rumikot id tiyonon di kotopong pomogunan.
“Ilo obuli silihon do iso pamagayatan kumaa Sabah mantad kawo ponombuluian sabagai pomoruhangan kumaa ogumu poh kagu pamagayatan hiti,” ka dau.
Nokotindapou nogi id abaabayan dilo nga Boyoon Montiri Tan Sri Musa Haji Aman, Presiden PBS Tan Sri Joseph Pairin Kitingan, Kumoduo Presiden PBS Datuk Seri Dr Maximus Ongkili om momuruan pikoruhangan Barisan Nasional (BN) ih suai.