130 graduan Kolej Sidma Sabah om Sarawak nokotorimo Diploma Balajaran Timpuunon Tangaanak
KIGINUMU
130 graduan mantad Kolej
Sidma Sabah om Sarawak nokotorimo Diploma Balajaran Timpuunon Tangaanak id Abaabayan Konvokesyen
Sidma montok ko-4.
Abaabayan konvokesyen dilo pinotimpuun di Mononontuduk om
Tabaal Abaabayan Balajaran Timpuunon Tangaanak Malaysia Prof Madya Dr
Bustam Kamri id iso hotel nointutunan id longkod pogun id tadau Koonom.
‘Anugerah Pengerusi Sidma 2017’ pinatahak kumaa di Malisa Goudi ih ponogi mongingia tadika ih kiumur
28 toun id abaabayan kolimpupuson konvokesyen dilo.
Isio songulun tondu ih pakaraja, ih nakalantoi minonorina do timpu dau miampai tososonong om toririmo manahak pongintongan idsuang balajaran om papaadang do kopoposion paganakan miampai nosiliu tina om sawo kumaa tulun tanak.
Pinongulubukan disio ginatang kopio om ontok ponginabasan dau, nokopokito isio do karaja osonong pomitanan maya mogisusuai kaparagatan ‘kokurikulum’.
Iman-imanon disio nopo nga sumiliu songulun momo’ia timpuunon tangaanak di opurokis om kiharo longkod panamangan tangaanak sondiri.
Id abaabayan iso’i, Marlaleez Lisamary Marten, 23, baino maamaso popotilombus do ponginabasan dau id bogian’Ijazah Sarjana Muda Pendidikan Awal Kanakkanak’ id Unitar International University Sabah tinangadan sabaagi Susumikul Kinangaian Tosonong 2017.
Namot dilo, Profesor Madya Dr Bustam minamarayou karaja Kolej Sidma sabaagi iso mantad institusi ponginabasan takawas misosondiri nointutunan ih nogonopan miampai insfrastruktur teknikal om kapanahak do koyuon di olumaag montok susumikul dau.
Kawagu dau, koposudangan om pongintongan ih patahakon kumaa ‘model’ pambalajaran linongotan ih ubasanan id Kolej Sidma montok pensyarah om susumikul dau, popiromut do ‘kuliah’ mitoguang miampai ‘konvensional’ om sistom sokodung okitonan ‘web’ otopot kopio nakaanu pinopoingkawas do rontob kinangaian tosonong susumikul ngawi.
Namot dilo, Minonimpuun om Ponorikohon Kolej Sidma Dr. Morni Kambrie minoboros do Kolej Sidma Sabah pinoturidong di toun 2002 om tuminimpuun pinoposodia do abaabayan Balajaran Timpuunon Tangaanak ontok toun 2009.
Rumirikot kinouliton toun ko-15, Kolej Sidma nakanau pinoposoribau do ogumu graduan ih kitoilalaan om nakalantoi id suang mogisusuai kaganaan, id bogian tulun ginumuan nangku toiko misosondiri id pointongkop pogun.
Ka dau, poposodia nogi Kolej Sidma do abaabayan suai maya do pisokodungan miampai Unitar om Kolej Sains Perubatan Universiti Cyberjaya (CUCMS) id suang mogisusuai kaganaan ponginabasan ih pokigunoon kopio om momogonop do kopokionuon mogisusuai pomorunan id Malaysia ontok timpu diti.
Nokotindapou nogi ih Ponorikohon Sidma College Dr Mornie Kambrie, Boyoon Upisor Eksekutif Azizah Khalid Merican, Potunud Kotundaan Pamadagangan Azalina Ngatimin, Potunud om Potunud Kousinan Hanizah Mohidin, pensyarah om graduan ngawi ih nokotorimo diploma sompori-pori kaamung noh miampai molohing ngawi.