Iso noduso, apat nosindualan id duwo kinantakan koligaganan misusuai

SANDAKAN: Songulun noduso om apat kagu munggui nosindualan id duwo kinantakan koligaganan misusuai ontok tadau Koonom om tadau Minggu.

Id kinantakan koiso, songulun kusai noduso sabap nagansip idsuang korita soira nokoompit koligaganan kopoompit duwo padsakaian ih nokopilanggar id Ralan Sandakan, Kampung

Batu Putih, sodop Koonom.

Boyoon Koupisan Bomba om Manampasi Malaysia (JBPM) Zon Sandakan Anddre Andrew minoboros do munggui ih au poh noilaan kointutunan, pinatantu do minidu pogun di bogian ambulans kalapas pinalabus di tinimungan bomba.

Poingkuro poh nga ka dau, songulun kagu munggui nointutunan sabaagi Mohd Muntir Mohayang, 39, au osongkuro nosindualan.

Minoboros isio do nokotorimo o bogian dau do pamalahauan kokomoi do kinantakan dilo id jam 7.27 dongotuong maya koluyungan MERS 999.

“Tokou kalapas dilo minonuhu do tinimungan mantad Balai Bomba om Manampasi (BBP) Kinabatangan minoi id tampat kinantakan kisinodu 36 kilometer minomoguno do iso korita binuruan di Upisor Bomba Wanan II Asmori Dahhairsyah songowian limo puru,” ka dau.

Minoboros Anddre do kinoligaganan kopoompit duwo padsakaian dilo Perodua Kancil om Toyota Hilux hinonggo duo munggui nokoompit.

“Songulun munggui kusai pinalabus di tulun ginumuan om pinaatod doid lamin pongusapan minomoguno do korita ambulans.

“Om songulun kagu munggui nagansip pinalabus di tinimungan bomba om pinatantu di bogian ambulans do minidu pogun, om kalapas dilo pinatahak doid bogian pulis montok laang potilombus,” ka dau.

Namot dilo, kinantakan koduwo kopoompit do duwo padsakaian ilo nopo nga Proton Saga om Isuzu D-Max ih nokopilanggar id Ralan Ranau Telupid di minsusuab tadau Minggu.

Minoboros Anddre do nokotorimo o bogian bomba do pamalahauan id jam 5.46 minsusuab om kalapas dilo minonuhu BBP Kinabatangan suminikap kuminaa id tampat kinantakan kisinodu 90 kilometer minomoguno do iso korita binuruan di Asmori songowian apat puru.

Minoboros isio do kiharo tolu munggui nokoompit hinonggo duwo mantad diolo nosindualan tokuudi om songulun kusai id padsakaian Proton Saga nagansip nga nakaanu pinapalabus di tinimungan bomba.

Koinsanai munggui kalapas dilo pinaatod doid lamin pongusapan minomoguno do korita ambulans,” ka dau.

Duwo padsakaian Perodua Kancil om Toyota Hilux ih nokopilanggar id kinantakan id Ralan Sandakan, Kampung Batu Putih. Koyuon Perodua Kancil ih noindamaan naraag asil kinantakan dilo.