Komuhakan PBS mositi minggisom kumalaja popogiot injin pomihian tagazo: Mositun
PENAMPANG: Pokionuon o Tinan Komuhakan Parti Pisompuuvan Sabah (PBS) tu kumalaja miampai hobi okuat montok papatantu do injin pomihian tagazo id boogizan gamut sakot ogiot.
Monunuat Tagazo PBS Datuk Johnny Mositun minoboos do Komuhakan om kusai/tondu nopo nga halata kumaa PBS suvai adadi pamahapau doid buu’an ih kivaa baino diti.
“Oupus okon ko ahal manaak ih tavasi kozo id kohobian, katapi kapanaak ih tavasi kozo id okuangan.
“Montok kouvang iso padamaan ku, samakin humoing okon ko kilati atagakan timpu tomuhok nga sumuvang gontob vagu mantad mogisusuvai kosivatan om kokuatan,” ka disido ontok minanaak bobooson id Pitimbungakan Hahansanan Tounan PBS Ko-32 doiti koniab.
Minoboos isido, Komuhakan nopo nga gamut kokuatan doid PBS om mositi minggisom kumalaja montok papatantu do timpu tabantahan parti di hobi tavasi.
Ka disido, oikot timpu pomihian tagazo timpu mikot, saavi-avi puu PBS kivaa tonggungan tavagat sandadaau.
“Ada udizo onu todoon diozu montok parti om layat Sabah.
“Miaga koubasanan, kivaa ‘propaganda’ pohobuson maza media sosial di hobi mantad ‘realiti’ pomogunan tototopot.
Ka disido, au ohimon do kivaa tinimungan ‘oportunis’ ih mimang mingkakat mokipihi dumadi calon.
“Songian kosivatan dosido adadi calon okitonan ohunggui, momihi izioho montok mamain ‘psikologi’ miampai humabus mantad parti.
“Koubasanan nopo, izioho diti mamain miampai ‘statistik’ kaaka do ogumu ih tumanud dosido suvai monondos boogizan om laang nogi tinutuban,” ka disido.
Au ohimon di Mositun do ahal dino nokoumba nantakan poguhui om kahapas pomihian tagazo tumanud do susuzan parti dio.
Ka disido, padamaan layat noopo gumaga ahaid sabap padamaan di oviton dosido ototopot montok layat om okon ko montok tinan sondii.
“Zotokou mositi monongkotohuod sabap kivaa teknologi ‘WhatsApp’ sabaagi kohuzungan montok papalayat kopoihaan.
“Okon iho noopo, okito tokou nogi o tuhun ih papalayat do kopoihaan gisom ‘iho-iho noopo’ om piopuvan doiho doiti miagal pusingon mahik,” ka disido.
Nokotindapou nogi id abaabazan dino nga Polosiden PBS Tan Sri Joseph Pairin Kitingan, Kumoduvo Polosiden PBS Datuk Seri Dr Maximus Johnity Ongkili om nuhudan buu’an PBS ih suvai.