Himo kusai, duvo bot monginsada tinaan APMM
TAWAU: Agensi Popogiotkuasa Maritim Malaysia (APMM) Uvang Maritim 18 Tawau minanaan duvo bot monginsada pukot tunda om himo kusai id duvo tiizonon kawaigan doiti sabap au tuminanud kootulan lisin ponginsadaan ontok minamagakom sada, songkosodop.
Kumoduvo Potunud Operasi, Uvang Maritim 18 Tawau Leftenan Komander Maritim Ahmad Firdaus Shaari minoboos do puu APMM ih pinapanau do pimpanaan minanaan iso bot monginsada id Bavang Serudong sabap minonoodo kalaja ngavi mamagakom sada id boogizan bavang id jam 11 kosuvabon.
“Pinomolisaan timpuuni, kivaa songuhun ‘juragan’ kinoizonon songovian duvo ‘awak-awak’ tuhun Indonesia ih kiumul binduugan 16 gisom 30 toun kivaa id suvang bot dino om songuhun mantad dosido au nakaanu pinopokito do nunuunu suat kointutunan tinan di totopot,” ka disido id suang kopoihaan doiti, koniab.
Idsuang ahal dino, minoboos isido do iso vagu bot tinaan om pinolisa id kavaigan Bavang Gagasak doiti id jam 1.45 sosodopon kahapas minonoodo do kahasaan iso’i, minamagazat pukot tunda id boogizan bavang.
“Asil pinomolisaan, kivaa duvo kusai songuhun ‘juragan’ kinoizonon om ‘awak-awak’ tuhun Indonesia sanda-daau kiumul 36 om 57 toun kivaa idsuvang bot dino, nga ‘awak-awak’ dino au nakaanu pinopokito do suat kointutunan tinan di totopot,” kavagu disido.
Idsuang ahal dino, minoboos Firdaus do saavi-avi bot om taanan winozo minugad doid jeti APMM Tawau montok ponoizukan potihombus tumanud Akta Ponginsadaan 1985 om Akta Imigresen 1959/63.
Minoboos isido do minggisom o boogizan dau papanau do kalaja ngavi kopogiotankuasa undang-undang id boogizan kavaigan Malaysia hoohobi Tawau miampai au monokilunding miampai nombo-nombo boogizan sabaagi haang mongipop kapaagatan ih kahasa do undang-undang Maritim.
Ka disido, tuhun togumu obuli monoodo sogu kaagaban om kapaagatan talaat id daat id kohuzungan 24 jam MERS 999 toi hongkod papanau kalaja Maritim Malaysia Tawau id numbul 089-752115.-Bernama