‘Ziarah Kasih Puteri UMNO Sandakan monulung koonduan tomulok okurang kamampuan

SANDAKAN: Wagas, tumau pagansak, teh om gula nopo nga bakaang taakanan ih kirati kopio notorimo di mongindapu kuih Sumarni Alimuddin.

Sumarni, 28 mantad Kampung Froest hiti nopo nga pialatan ponorimo toluod barang kogunoon dapur montok koonduan tomulok mantad paganakan haro kamampuan id suriba Abaabayan Tumombului Oupus Puteri Peduli 2.0 di kawawagu.

“Aiso karaja ku om tapa ku nopo nga aiso noh. Apasi yahai miampai asil dagang tina papadagang kuih id doumbangan lamin ontok timpu kosuabon om pandapatan tikid tadau au osongkuro kopongunsub,” ka dau kumaa Bernama.

Ka dau toluod barangan kogunoon dapur dilo kaanu papagaan do kawagatan disio om tina dau.

“Alansan kopio oku do abaabayan tumombului koupusan diti kaanu popotilombus gisom doid timpu rumikot tuh kaanu manahak asil kumaa tinimungan di okurang kamampuan miagal dogo,” ka dau.

Abaabayan dilo pinapanau di Puteri UMNO Sandakan om toluod dilo pinatahak sondiri di Boyoon dau Siti Haiba Abdul Majid.

Tumanud Sumarni, iti nopo nga kakapan kumoinduwo Puteri UMNO Sandakan doid lamin dau kalapas Jun nakatalib ontok pinapatahak do toluod kogunoon Aidilfitri kuminaa tadik dau kiumur 12 toun.

Songulun kagu ponorimo, Arni Binti Running, 22 mantad Kampung Sim-Sim, minoboros do toluod ih pinatahak maya do abaabayan dilo kirati kopio montok disio om paganakan dau.

“Au oku pakaraja om sawo ku nopo nga pakaraja id iso kadai perabot noopo om sabap dilo koponulungan diti gatangon kopio ku sabap monulung dagai paganakan mantad kawo kogunoon barangan dapur,” ka dau. Id ahal dilo, minoboros ih Siti Haiba do abaabayan ‘Ziarah Kasih Puteri Peduli 2.0’ papanaon id piipiro tinan kampung id posorili Sandakan pialatan dilo id Kampung Sim Sim, Kampung Forest om Tinusa.

Minoboros isio do abaabayan dilo nopo nga montok kumoinduwo pinapanau montok toun diti miampai ih kumoiso ontok Februari nakatalib.

Minoboros ih Siti Haiba do bogian dau momili 60 ngaran ponorimo ih nokorijstor idsuang E-Kasih’ ilo nopo nga sistem pangkalan data ih kiharo id suriba gontob komosikinan.

Kiginumu 30 ponorimo sakadai maya pinanganjuran abaabayan dilo ontok Februari nakatalib om 30 kagu ontokwulan diti, ka dau.

Suai ko ‘Program Ziarah Kasih’, pinapanau nogi Puteri UMNO Sandakan do abaabaayn suai ih kopoompit do toilalaan om sakadai koposikulan miagal lokusop ponombiran om pongolumisan miampai yuran koporijistaran aiso kabarai montok monulung koonduan ngawi popoingkawas do toilalaan om kaanu nogi popomogot do konuonuan.

Minoboros Siti Haiba do ontok Disember diti papanau o bogian dau do abaabayan ‘Back To School’ montok papagaan do kawagatan molohing di okurang kamampuan montok poposodia do pakaian om koumatan ngawi sikul. -Bernama