Polinta popoobi RM6.3 lizong
# Projik manakadai mongumbasi hamin monginsada 2017
PUTATAN: Monginginsada pointongkop pogun kapaganu asil kiikila RM6.3 lizong maza Projik Sakadai Tavasi Mongumbasi Pomuhaminan Monginsada 2017.
Potunud Tinan Kobuu’on Sada Malaysia (LKIM) Sabah Mohd Jamil Abdullah minoboos do poluntukan ih pataakon mantad kopolintaan dino nopo nga kapangaputan projik ih nokouhan no ontok 2016.
“Monginsada ngavi id Sabah nopo nga ih poingguugumu kaanu asil diti piagahon pogun ngavi suvai.
“Ontok toun diti, nakaanu tokou poluntukan kiikila RM6.3 lizong mantad polinta montok mongumbasi hamin monginsada id pointongkop pogun.
“Poguhu haid panganjul sakadai diti nopo nga Tinan Kotundaan Pomutanaman Parlimen (MP3) maza koobian LKIM.
“Nga, tuminimpuun 2016 saavi-avi poluntukan maza LKIM diti maan pouhano sondii mantad tinan,” ka disido.
Noboos disido ahal dino doid monunuat abal id Abaabazan Pinonimpuunan karnival Industri Asas Tani (IAT) Nazatan Pogun doiti koniab.
Ka disido potitikid hamin monginsada kaanu ‘maksimum’ RM12,000 montok mongumbasi hamin dosido.
“Poguhui diti, projik dino nokomoi momoguno do kalaja kuntiliktol nga sinimbana polinta o haang dino miampai mogitatabang.
“Ontok 2016, mongumbasi hamin ngavi monginsada nasalasai no om baino diti masaon tokou popoindahan kapatantuan kalaja momongo om pambalazan,” ka disido.
Nokotindapou nogi id abaabazan dino nga Kumoduvo Monunuat Atatap Komontilian Pomutanaman om Pomounan Taakanan Sabah K. Zulkifle Harrith, Puu Jemaah LKIM Datuk Abd Razak Sakaran, Potunud LKIM Tana Pisompuuvan Labuan Dzulkifli Mad Ali om Poniikon Koisaan Monginsada Pogun Sabah (Pengasah) Datuk Arsit Sedi.