Paparayat kopoilaan au otopot kapakakung karaja porinta momodimpot pogun koburu - Hamisa

TAWAU: Kaparayatan kopoilaan au otopot (palsu) maya media sosial obuli kapakakung do karaja porinta momodimpot ‘status’ pogun koburu, ka di Panakadai Montiri Kotundaan Kotos om Koburuon Teknologi Kopoilaan Sabah, Datuk Hamisa Samat.

Minoboros isio do kaparayatan kopoilaan pilasu mantad bogian aiso tonggungan nogi osiliu panangadan doid kotoonongan, kolumaagan om pisompuruan naanu timpu diti om kapanahak do mogisusuai waya taraat suai.

“Kopolunggui kopio soira haro bogian di aiso tonggungan paparayat kopoilaan au otopot om pilasu kumaa rayat montok kopontingan ahal sosongulun noopo,” ka dau ontok pinotimpuun do abaabayan popogirot koupusan Negaraku Komuniti 1Malaysia kopoompit do Kampung Simpang 3, Kampung Kijang Merotai Besar hiti.

Isio ih nogi Puru Lamin Koundangan Pogun Tanjong Batu minoboros do toririmo porinta minggisom mogowit pogun koupusan diti doid ‘dimensi’ wagu momodimpot ‘status’ pogun koburu miampai popointutun do mogisusuai ralan tonudon timpu tanaru montok mamalan pokihobak pogun.

“Tokou gulu poh haro ‘Gagasan 1Malaysia’ montok momodimpot pogun koburu ontok toun 2020 om baino porinta popointutun do Transformasi Nasional 2050 (TN50) toinsanan dilo montok tujuan ih iso’i. “Sabap dilo au tokou obuli mokinongou kopoilaan okitonan kabar tongus noopo om au otopot doulu noh id media sosial miagal Facebook, Twitter, Instagram, WhatsApp,” ka dau.

Hamisa ih nogi lansanon rayat Tanjong Batu minoboros do sabaagi rayat ih oupus do pogun diti mositi do papatantu do kopoilaan tototopot pogului paparayat dilo idsuang mogisusuai ralan.

Alansan kopio isio kumaa rayat Sabah kopomoguno poimponu do kopoilaan om kotorinaan ih pinosodia do koupisan ngawi porinta montok tulun ngawi kaamung noh kodimpotan internet id kampung-kampung. -Bernama