Aiso ahal agama id Sabah
# Kolumaagan pialatan tulun ngawi mositi gaga’on, ka di Musa
TAWAU: “Aiso ahal agama id pogun tokou ih koupusan diti,” ka di Boyoon Montiri Tan Sri Musa Haji Aman id abaabayan Pinangaramitan Maulidur Rasul Nayatan Pogun Sabah, hiti koniab.
Tumanud dau, pihubayaan toiko piunungan om gatang koposion id pialatan tulun ngawi id pogun diti lobi okito kopio om nogi kopokionu rayat mooi toririmo gumaga do ahal dilo.
“Toou haro kinoiyonon sandad di aiso kopiagalan montok mamagayat tulun labus rumikot id Sabah, nga ontok id timpu iso’i nogi haro mogigion ngawi ih olumaag.
“Au tokou muhang haro tinan ih kuminam tumingan id waig olobou om nogi kuminam mimpulitik do agama,” ka disio.
Pinosorou nogi di Musa mooi do rayat au popologos do koyuon di nantakan id Iraq om Syria karalad id pogun diti montok papatantu do asil ih naanu tokou baino diti do kotilombus.
Kokomoi pangaramitan momuondom do Tadau Kinosusuon Nabi Muhammad SAW ih pinaharo nopo nga, angatan disio o rayat tuh momit do koyuoyuon pomusarahan di Rasulullah.
“Koulalahon ginawo om kinoporian dau kopogowit ponimbanan kumaa koinsanai pomogunan, om nogi minomonsoi isio do pinonimbanan tagayo kopoompit do mogisusuai ahal kopoposion montok omitanan.
“Idsuang ahal tulun ngawi tokou ontok baio diti, koponimbanan kiguno kopio montok monimban ralan kopoposion miampai ‘holistik’ om kotilombus do kapaganu do koburuon kotundaan pogun,” ka dau.
Minoboros isio do rayat mositi tumilombus miampai haro koulalahon ginawo di tosonong kopio om ‘responsif’ montok papalantoi do karaja ngawi ponimbanan porinta montok kapaganu do koburuon pogun om kolumaagan tulun ngawi.
‘Baginda Rasulullah’ nogi kinomi dau sabaagi osiliu pomitanan momuruan di lobi ogumu kumaraja om ingkudian mimboros om monuduk gatang koupusan.
“Pinosotol nogi disio o koulalahon piupakatan om pihubayaan/piunungan om mogoduw do tulun ngawi dau do mogitotongkiad om mogioduw, kaamung noh mogiraraat, mogitotondos om popoikum-ikum id pialatan iso om suai.
“Osiliu nogi pomitanan ih ‘Rasulullah’ kumaa dotokou montok mintamong piturubungan miampai tulun okon Silam, om nogi oduhan tokou paparaat do tulun okon Silam,” ka dau.
Namot dilo, bagas Kumoduo Pesuruhjaya Polis Sabah Datuk Awang Sahari EM Nadzeer nopili ruminamot Tingadan Maulidur Rasul om Boyoon Polis Watas Kudat, Supt Douglas Nyeging Taong nopo nga nokotorimo Tingadan Poimbida Maulidur Rasul.
Awang Sahari nopo nga tanak Mambakut, Sabah, nokopinsin di toun nakatalib om pinoimagon sabap toluod dau idsuang Polis Diraja Malaysia solinaid 39 toun kotorinan kamaung noh idsuang karaja ngawi haro kobolingkangan takawas.
Douglas nopo nga ih nohodi mantad Kapit, Sarawak nopili tumanud do sunduan om kopiomungan dau miampai tulun ngawi songkoiyonon sundung pia misusuai kaadat-adaton om agama.
Goduwo-duwo tingadan dilo pinotunui di Musa kopinamot pinangaramitan Maulidul Rasul ih sinaasi nogi di kiikira 10,000 tulun kopoompit do 83 kontinjen mantad bogian porinta, misosondiri om tinan balajaran ruminulud mamanau kisinodu 1.8 kilometer.
Nokotindapou nogi ih nuludan mamanau dilo nga Kumoduo Boyoon Montiri Sabah Datuk Seri Yahya Hussin, Speaker Lamin Koundangan Pogun Datuk Seri Syed Abas Syed Ali om montiri Kabinet Sabah, lansanon rayat, om boyoon ngawi koupisan pisompuruan om pogun.