Tanak Mororobuat Melalap manakadai pitatabangan mongumoh parai
MELALAP: Koubasanan mogitatabang mongumoh kakal tonudon tulun tokou gisom baino sundung kowoyoon mitatabang nopo nga nokosimban. Ingkaa no kokitanan id iso pitatabangan mananom parai id iso koumaan id Kg Buna,
Melalap hiti di songkonihab.
“Pitatabangan diti nopo nga toguangon do iso tinimungan mogigiyon om tiyonon mitatabang nopo nga tumanud kopokionuan do isoiso pongumaan,” ka do kointalangan naramit mantad tinimungan kohompit.
Umoi Gaikun, songulun poingamung id tinimungan nopungaranan do Tanak Mororobuat Melalap dilo pinopointalang do oinsanan puru notikidan do rasuk-t di oiyo ponoko kointutunan do puru ngawi dilo tumabang.
Kopoilaan naramit pinopointalang do tinimungan dilo karamit pongusin mantad di sanganu pongumaan sabaagi do ponoluod kumaa kaparagatan do tinimungan nokomoi.
Ontok pogulu laid, mitatabang nopo nga kapaampai toinsanan mogigiyon id iso kampung montok tumikid pongumaan id kampung do tikid tadau montok tumabang gisom asadapan.
Tikid pitatabangan gatangon oh winakas di potitikid tulun tuminabang montok sulian di natabangan soira do orikot timpu di minongoi tabang do mitatabang.
Ontok mitatabang, songigit-igit ih minongoi tabang do kokorui montok pogiilangan makan soira do orikot timpu mundorong id pitangaadau.
Om sanganu pitatabangan nopo nga poposodia tinumon kumaa toinsanan tuminabang kaampai no tinumon linutau, ponguru tuuw ontok pitangaadau.