Poingkawason kosonongon ponombuluian ‘homestay’
# Pongolisinan pongidopan kampung gatangon kawagu ontok 2018
KUDAT: Upis Komontirian Ponombuluian om Koubasanan (MOTAC) Sabah manahak pongintongan doid kapamagatangan kawagu pongolisinan pongidopan kampung id pogun diti ontok 2018.
Potunud Upis Komontirian Ponombuluian om Koubasanan (MOTAC) Sabah, Ag Ahmad Zaki Abu Bakar minoboros do kapamagatangan toinsanan dilo montok mongilo do pongidopan kampung ih kakaal aparagat om ih au nodi papanau do kotorinaan.
“Gisom November 2017, kiharo 35 pongidopan kampung papanau kotorinaan id Sabah om gaab tagayo kapamagatangan kawagu dilo nopo nga montok papatantu do mongindapu toiko popoburu do pomorunan dilo kaanu manahak kotorinaan di tosonong kopio kumaa tutumombului ih korikot.
“Alansan kopio tokou tuh kaanu popoingkawas do korikohonon tosonng kopio ponombuluian pongidopan kampung om kaanu nogi popoingkawas do konuonuan tulun ngawi id watas labus kakadaian.
“Sokiro ko haro mongindapu di au kaanu manahak korikohonon di tosonng kopioom kotorinaan di nakatantu noh, au tokou mosi-rosi montok mamagayat lisin papanau kotorinaan diolo,” ka disio.
Suai ko ilo, pinosunud nogi di Zaki do ‘terma’ pongidopan kampung toiko ‘homestay’ nogi asaru pasalaan di wookon tinan di aiso tonggungan.
“Kasalaan momoguno ‘terma’ kumaa lamin sewaan baraian tikid tadau toiko linominon pongidopan manahak kasala pangaratian kumaa tulun ngawi kokomoi do ponombuluian kopoompit do mogigion ngawi (CBT) diti.
“Alansan kopio yahai do tinan di aiso tonggungan diti au momoguno ‘terma homestay’ toiko pongidopan kampung montok papalaku do linominon pongidopan diolo.
“Montok kapaganu do ‘status homestay’ mongingindapu kotorinaan mositi momogonop do kooturan ngawi di pinatantu pogului mangapalai lisin mantad komontirian,” ka dau pinapatarang id ‘Program NBOS 1Malaysia Voluntourism: 1Malaysia 1Volunsharing Pengalaman Program Homestay Bersama Media’ pinajur do Upis MOTAC Sabah id Kudat, di tadau Kolimo.
Kiginumu 15 tulun kaampai mantad staf Upis MOTAC Sabah, monunurat abar om susumikul Ponorinaan Ponombuluian, Universiti Malaysia Sabah (UMS) tuminanud do abaabayan tolu tadau id pongidopan kampung dilo.