Mogigion Sepanggar pokionuon tumilombus manahak sokodung poimponu kumaa BN
KOTA KINABALU: Pokionuon di Puru Parlimen Sepanggar Datuk Jumat Idris o mogigion ngawi id bogian dilo tumilombus oupus om manahak sokodung poimponu kumaa koporintaan Barisan Nasional (BN) montok papatantu do kotundaan di napalan id watas dilo kaanu popotilombus.
Minoboros isio do ogumu kotundaan di pinoburu do porinta id bogian Sepanggar kaamung noh pinopoinggayo do Ralan Sulaman montok manalasai do kobolingkangan asasakan ralan id ralan dilo.
“Pokionuon ku o rayat id bogian diti (Sepanggar) do au mundaliu do sokodung kumaa parti gugumaga. Potitikid ku minsuang id kampungkampung haro mogigion ih moboros do muhang mogundi parti suai (gugumaga) sokiro ko au oku mingkakat monokisaap kawagu id pomilian tagayo ko-14 (PRU14) tiinu.
“Pokionuon ku o rayat papatam do tiwou dilo sabap ih kiguno kopio undion nopo nga BN om okon ‘Jumat’. Ponguhatan isai ih tumanding id Parlimen Sepanggar tumanud dois Ponorikohon BN. Mantad dilo rayat hiti apatut kopio tumilombus monokodung porinta BN,” ka dau kalapas minonutub Abaabayan Kesukarelawanan Pingludan Toilalaan Komulakan om Sipoot id Kampung Numbak, Sepanggar doros hiti koniab.
Minongomi kokomoi abaabayan dilo, noboros di Jumat do abaabayan ‘Institut Kemahiran Belia Negara’ (IKBN) Kinarut dilo nopo nga iso kopoinsomokan komulakan songowian tulun ngawi montok popogirot sunduan kesukarelawanan idsuang tinan komulakan.
Abaabayan diti pinaharo id kakampungan sawat waig Numbak miampai 60 susumikul IKBN minogitatabang minonginsonong sunsuyon id kampung diti. -Bernama