MINSINGILO BOROS KADAZANDUSUN APASI BOROS, APASI TINARU

Nulud di Tatak Barambang BOROS

ka do tulun mantad pogun Malaya, “tobuk oiyo toitom, ginawo sopisuwai,” ka. Otopot ilo tu nung kinongohon o dila tulun moboros, mogisusuwai o dawot dila (dialect) diolo tumanud do tinaru dau. Tulun Sina moboros boros Singkung om tulun India moboros boros Tamil miampai posuraton diolo boros momoguna ponunurat Character (Character Writing), okon ko momoguno ponunurat Rum ((Roman Alphabets).

Ogumu po tinaru suwai id pomogunan diti ih poposurat boros diolo do momoguno Characters ih kampai no tulun Gipun, Korea, Siam, Taiwan om susuwai po. Tulun Kadazandusun miagal nogi dilo tulun mantad pogun Malaya tu au nokopudali do ralan poposurat do boros tinaru nga olos noopo do Ponunurat Rum. Koposuratan diolo rinoitan do Alphabet, ka. Id suwang do Alphabet haro soginumu 26 Ponurat (Letters) ih gunoon do pangadawot (spelling) do pomoros (words). Ponunurat dino kampai no Aa, Bb, Cc, Dd, Ee, Ff, Gg, Hh, Ii, Jj, Kk, Ll, Mm, Nn, Oo, Pp, Qq, Rr, Ss, Tt, Uu, Vv, Ww, Xx, Yy, om Zz.

Boros Kadazandusun au kopomoguno id kopongoroitan (pronunciation) do toinsanan dilo 26 Ponunurat Rum. Ponunurat di au do boros Kadazandusun oroit (pronounced) kampai no C, F, Q, X om E mantad no do C adawot do S, om F adawot do P, om Q adawot do K, om X adawot do KS, om E adawot do I toi ko O.

Sumusuut diti nopo nga kosingilaan do piipiro pomoros (words) boros Kadazandusun miampai pangadawot (spelling) om nonuan do komoi do boros English. Mantad do 26 Ponunurat Rum dino, milo boros Kadazandusun do mangadawot (spell) do koinsanai pomoros (words) boros Kadazandusun. Mantad pangadawot dino, au apagon o kapangadawatan (spelling) toi ko kopongoroitan (pronunciation) do pomoros boros Kadazandusun nung piagalon do pangadawot om pomoros do boros tinaru suwai. Kopisanangan do mambasa.