Puru ‘Two Brothers’ ihumon
# Bogian monguasa mogihum puru Abu Sayyaf ih kakaal poingidu
KOTA KINABALU: Masaon do tinimungan koumoligan Malaysia om Filipina mogihum songulun kagu puru tinimungan Remy toiko nointutunan sabaagi ‘Two Brothers’ ilo nopo nga tinimungan panazangan montok tusinpokilapusan (KFR) ih aparagat papanau do koimaan taraat maya piwolitan id kawaigan pogun, ka di Pesuruhjaya Polis Sabah Datuk Ramli Din.
Minoboros isio do tinimungan ‘Two Brothers’ ih pinuruan 11 tulun, aparagat om ogumu papaharo do koimaan taraat maya piwolitan id kawaigan pogun ontok 2014 gisom koimpupuson toun 2015.
“Apat puru tinimungan dino nokomoi nakaanu minamadi noduso di tinimungan koumoligan Filipina, om songulun kagu binadi noduso di tinimungan koumoligan pogun id kawaigan Silam, Lahad Datu, songkosodop.
“Limo kagu puru tinimungan dilo nakaanu minanaan di tinimungan koumoligan Filipina om songulun kagu kakaal poingidu,” ka dau.
Noboros disio ahal dilo kuminaa monunurat abar kalapas pinotimpuun do Abaabayan Ponutuban Inisiatif “Have Ex-Policeman
Serve As Neighborhood Safety Leaders” hiti konihab.
Minongomi potilombus, noboros di Ramli do kopoilaan di notorimo minoboros do suspek ih masaon ihumon dilo baino kiharo id kaabatan Filipina om asasaru mimpanau sumuang kawaigan pogun.
“Otumbayaan ikoi do suspek dino nokomoi nokopironit noh miampai tinimungan KFR ih suai ih minsisiliu sabaagi monginsada,” ka dau.
Namot dilo, minongomi kokomoi abaabayan dino nokomoi, minoboros Ramli do laang tosonong ih papanaon id suriba ‘Strategi Lautan Biru Kebangsaan’ (NBOS) dilo kitujuan montok papaharo dopisokodungan om poposiliu do nokopinsin ngawi pulis sabaaagi “mato om tolingo bogian pulis’ id bogian kinoiyonon diolo montok monulung bogian pulis om tulun ngawi mangantob om momunso koimaan taraat.
“Pokionuon dagai tuh nokopinsin pulis rumijisto sabaagi ‘Ahli Volunteer Smartphone Patrol’ (VSP) montok papasanang diolo manahak do kopoilaan miampai tosisikap miampai ralan poposuang do kopoilaan, gambar, video om tampat kinantakan kumaa bogian pulis,” ka dau. -Bernama