Onom paganakan natagakan hamin tiizonon
PAPAR: Onom paganakan natagakan hamin tiizonon kahapas onom hamin nopunso notutudan id Skim Pongizonan Kinarut, doiti di sosodopon tadau Kaapat.
Huguan Pulis Uvang Deputi Superintendan Ladamah Sulaiman minoboos do kinantakan jam 6.40 sosodopon kopoompit do 43 paganakan koinsasanai mantad onom paganakan.
“Papanau kalaja pomisokan ih tinoodo di sontimungan nopupusan id jam 7.50 dongosodop om kinantakan au nokopompit do kinohigaganan kiniopon om aiso kinosinduahan pinoluput.
“Montok timpu diti munggui pinoizon id Dewan Serbaguna Taman Pantai Lok Kawi Kinarut doiti om asil pinonoizukan nokoiho do aiso nunuunu koimaan talaat nakaamung idsuang kes diti,” ka disido.
Namot dino Upisol Bomba Vanan I Aloysius Stephen Amit minoboos do nokotoimo o boogizan dau do pamahaavan kaagaban id jam 6.39 sosodopon.
Ka disido soginumu 27 puu koinsasanai mantad Balai Bomba om Mongumohig (BBP) Papar kaamung no puu sakadai mantad
BBP Penampang om Kota Kinabalu sinuu minugad doid tampat kinantakan.
“Puu bomba mantad BBP Papar sansagan minaganu timpu kiikila 18 minit huminikot doid tampat kinantakan sumusuut pivohitan sinodu kinantakan mantad balai kisinodu 19 kilometer.
“Papanau kalaja kopomisokan tosikap pinapanau minomoguno do kotos vaig mantad injin bomba o kinotutudan nakaanu minanamong piipio minit kahapas dino,” ka disido.
Minoboos isido do papanau kalaja naavi id jam 9.21 dongotuvong om aiso kinosinduahan pinoluput id kinantakan diti.
Ka disido natadon kinantakan om ginumu kinolugian kakaal id ponoizukan tinan monguasa.