Duwo suspek mongorumpak ginakom idsuang timpu sojam

LAHAD DATU : Pulis minanaan duwo kusai sabap kikotumbayan do nokoompit id suang kes mongowumpak kitimungan om minomoguno do sinjata, id kinantakan ih nantakan id Ralan Pantai mitoguang miampai Stadium Bandar Lahad Datu, hiti di tadau Kaapat.

Ponowoli naamot Boyoon Pulis Watas Lahad Datu, ASP Mohd Fadzil Ali, minoboros do sumusuhut pinoruputan di notorimo, goduwo-duwo suspek ih kiumur 21 om 27 toun dilo nakaanu minanaan idsuang timpu sojam kiikira jam 12.50 dongosodop do namot kiharo id posorili bogian bandar Sri Perdana koniab.

Ka dau, nakapamagahau nogi pulis do iso watang bosi paip om iso padsakaian kawo Viva ih ginuno suspek id kinantakan dilo om nokokito nogi iso talipaun piowitowit jenama Yess ih kikotumbayaan do pinanakau.

Id kinantakan sodop Kaapat nakatalib, munggui ih nogi songulun pakakaraja tulun ginumuan kiumur 35 toun nosindualan id ponong kabang kalapas rinumpak di goduwo-duwo suspek do naamot id pindalanan muli doid lamin dau miampai pinapanau motosikal.

Tumanud Fadzil, ontok kinantakan munggui nataan noh di goduwo-duwo suspek ih suminakai korita kawo Viva pogului minaganu laang minongimang dau id wuros, tulu om tinan minomoguno do longon om sawatang paip pogului minogowit minogidu iso talipaun piowitowit kawo Yess sanganu koupisan tiyonon munggui pakaraja.

“Munggui ih nosindualan kalapas dilo ruminomut 999 montok mokianu ponulungan pulis.

“Goduwo-duwo suspek baino tinaan montok ponoriukan potilombus om kes soriukon tumanud Seksyen 394 Kanun Koinggoritan,” ka dau.